12 сутак арышту за наведваньне Чырвонага касцёлу

Суддзя Маскоўскага суда Менска Яўген Хаткевіч  8 лютага прысудзіў мінчуку Міхасю Лебедзю 12 сутак арышту.

Лебедзя прызналі вінаватым ва ўдзеле ў пікеце салідарнасьці, які праводзілі актывісты моладзевых арганізацый 20 сьнежня на плошчы Незалежнасьці.

Нагадаем, што адміністратыўную справу суд разглядаў некалькі разоў, паколькі сьведкі-міліцыянты ўвесь час блыталіся ў паказаньнях. Затым Лебедзь заявіў у судзе, што падаў скаргу ў пракуратуру на дзеяньні міліцыі, пасьля чаго суддзя абвясьціў перапынак, каб азнаёміцца з высновамі праверкі.

Ён быў затрыманы 20 снежня, калі накіроўваўся ў Чырвоны касцёл. Пры гэтым, яго зьбілі з ног, нанеслі некалькі ўдараў дубінкай і ўкінулі ў аўтазак. Супрацоўнікі спецпрыёмніка на Акрэсціна праз некалькі гадзін выклікалі Лебедзю “хуткую дапамогу”, якая адвезла зьбітага грамадзяніна  ў 10 клінічны шпіталь.