Чарговы суд за адмову ад дактыласкапіі

Жыхар вёскі Мельнікі Маларыцкага раёна Рыгор Лук’янчук, які адмовіўся ад дактыласкапіі, на разгляд справы з’явіцца не змог, бо не атрымаў позвы з суда.  

Рабочага Берасцейскай чыгункі не адпусцілі з працы на судовы працэс, таму што на руках ён меў толькі копію міліцэйскага пратакола.  

Суддзя Пётр Барычэўскі пагадзіўся, што работа ёсць работа. І сказаў, што  прысутнасць на першым паседжанні Лук’янчука неабавязковая. Па словах суддзі, справа не будзе разглядацца па сутнасці, бо пратакол трэба вярнуць на дапрацоўку ў Маларыцкі РАУС. А на другім паседжанні, паводле суддзі, Рыгор Лук’янчук, калі хоча прысутнічаць, то няхай прысутнічае - позву ці суд яму дашле, ці міліцыя абавязана так бы мовіць забяспечыць яўку.

Сам Рыгор Лук’янчук кажа, што ён законапаслухмяны грамадзянін і гатовы прыйсці ў суд па позве, калі атрымае яе.

Нагадаем, што без ведама Р. Лук’янчука супрацоўнікамі Маларыцкага РАУС быў складзены і накіраваны ў суд пратакол па артыкуле 23.4 КаАП – за непадпарадкаванне законным патрабаванням супрацоўнікаў міліцыі. Фактычна, як выказаўся суддзя, за адмову ад дактыласкапіі.

“Праваабарончая хроніка”