Максім Чарняк – сведка ці падазраваны?

Сёння, 15 красавіка, бабруйчаніна Максіма Чарняка зноў выклікалі на размову ў РАУС. У позве, якую непаўнагадоваму хлопцу выдалі ўжо ў аддзяленні, было пазначана, што ён выкліканы ў якасці сведкі. Але ў працэсе “размовы” Максіма паставілі на фотаўлік і перапісалі асаблівыя прыкметы.

- Мяне выклікалі зноў па крадзяжы, і спачатку ў кабінеце аператыўніка Андрэя Федарцова мы сапраўды размаўлялі на гэтую тэму, - распавядае Максім Чарняк. - Але як толькі ён скончыў мяне апытваць, за мной зайшоў іншы міліцыянт, ці следчы, я дакладна не ведаю - Сяргей Сідараў. Ён быў апрануты па грамадзянцы, і адразу пачаў цікавіцца маім грамадска-палітычным жыццём. Яго цікавіла, на якіх сайтах я зарэгістраваны, да якога руху адношуся – рэлігійнага і палітычнага. Я адказаў, што год таму, па просьбе сваёй дзяўчыны выйшаў з “Маладога Фронта”, і палітыкай не займаюся. Потым ён пытаў, з кім я перапісваўся ў інтэрнэце наконт выбуха ў Мінску, але я даўно не быў у інтэрнэце, аб чым яму і паведаміў… Падчас гэтай размовы ў кабінет зноў зайшоў Андрэй Федарцоў, і спрасіў: “дык гэта ён ці аднаго прозвішча?”, - на што атрымаў адказ: “ён, але нешта мала кажа”. Што яны мелі на ўвазе, я не зразумеў, таксама як не разумею, у чым мяне падазраюць?!

Таксама Сяргей Сідараў цікавіўся аб хобі Максіма – капальніцтве, дзе і з кім ён гэтым займаецца. Пытаў, калі хлопец апошні раз размаўляў з Арцёмам Дубскім, з кім ён увогуле сябруе, перапісваецца ў інтэрнэце.

- Пасля размовы мяне павялі запісваць на фотаўлік, зрабілі шэраг фотаздымкаў, перапісалі мае прыкметы, спрасілі якія ёсць шнары, ці ёсць татуіроўкі, усё гэта занеслі ў журнал, - працягвае распавядаць Максім Чарняк. – Падчас гэтай працэдуры чалавек з кабінета фотаўліка спрасіў: “па якой запісваць?” – “па 40-й” – адказаў Сідараў. Што гэта за 40-я, якога кодэкса, я не зразумеў. Таксама я цікавіўся, чаму ў РАУС не выклікаюць майго апекуна, - бабулю, ці прадстаўніка коледжа ў якім навучаюся. Але мне адказалі, што гэта іх права, каго выклікаць. Толькі мне не зразумела, чаму, калі я лічуся сведкай па крадзяжы, у мяне пытаюць пра палітыку і ставяць на фотаўлік? Яны нават трэці раз за тыдзень хацелі зняць адбіткі пальцаў, але я ім сказаў, што гэта ўжо перагіб. Дарэчы, цягаюць мяне сведкам па скрадзеным старым бушлаце, валёнках, кіпяцільніку і вудзе. Яны былі скрадзеныя маім сваяком у Бабруйскім раёне, і па сутнасці, гэтым бы павінна была займацца раённая міліцыя…

“Праваабарончая хроніка”