Рэдактар газеты “Вольны горад” абскардзіць папярэджанне пракуратуры

Рэдактар незалежнай крычаўскай газеты “Вольны горад” Сяргей Няроўны 19 красавіка атрымаў афіцыйнае папярэджанне ад Крычаўскай пракуратуры за подпісам пракурора Трывайлы.

У папярэджанні адзначаецца, што ў артыкуле “Чорныя дні”, аўтарам якога з’яўляецца рэдактар, утрымліваецца крытыка дзеянняў вышэйшых службовых асобаў дзяржавы, а таксама службовых асобаў праваахоўных органаў і ходу расследвання па крымінальнай справе па факце здзяйснення тэрарыстычнага акта на станцыі метро “Кастрычніцкая” 11 красавіка.

“Дзеянні па распаўсюду такога кшталту неабгрунтаванай інфармацыі носяць дэструктыўны характар і па сутнасці накіраваны на дыскрэдытацыю праваахоўных органаў, беларускай дзяржавы і грамадства”, - адзначаецца ў дакуменце.

Пракурор Трывайла афіцыйна папярэдзіў Сяргея Няроўнага аб недапушчальнасці распаўсюду ў друкаваным выданні “Вольны горад” неадпаведных рэчаіснасці звестак, а таксама інфармацыі, якая ўтрымлівае паклёпніцкія і абразлівыя выразы ў адрас службовых асобаў дзяржаўнай улады.

У выпадку здзяйснення пазначаных вышэй дзеянняў надалей рэдактар газеты можа быць прыцягнуты да вызначанай законам адказнасці.

Сяргей Няроўны з папярэджаннем не згодны і збіраецца яго абскарджваць у бліжэйшы час.

“Я лічу, што гэта абсалютна незаконнае папярэджанне. Яно звязана, у першаю чаргу, з тэрактам у мінскім метро. Цяпер улада выкарыстоўвае гэтую нагоду для таго, каб ціснуць на журналістаў. Гэта спроба закрыць рот тым, хто свабодна думае і піша. Думаю, што папярэджанне з’явілася па загадзе з Менску, пракурор вырашыў прымяніць яго да нашай газеты”, - гаворыць Сяргей Няроўны.

Пры гэтым рэдактар звяртае ўвагу на тое, што газета не мае афіцыйнай рэгістрацыі:

“І тым не менш наша неафіцыйная газета атрымала афіцыйнае папярэджанне. Юрыспрудэнцыя тут адпачывае. Мы будзем абскарджваць рашэнне пракурора ў абласной пракуратуры, а таксама, у выніку неабходнасці, у суддзе”, - адзначыў рэдактар незалежнай газеты.

“Праваабарончая хроніка”