Дэмактывіст скардзіцца на неправамернасць ператрусу ў яго кватэры

Барысаўскі дэмактывіст, член Аб'яднанай грамадзянскай партыі Міхаіл Васільеў, які падчас прэзідэнцкіх выбараў 2010 года з'яўляўся даверанай асобай кандыдата Ўладзіміра Някляева, падаў скаргу на неправамернасць праведзенага ў яго кватэры ператрусу.
«Ператрус быў праведзены 21студзеня бягучага года супрацоўнікамі Барысаўскага РУУС: капітанам міліцыі Галаванавым, старэйшым лейтэнантам Забалуевым, экспертам-крыміналістам маёрам Мельнічэнка, - распавядае Міхаіл Васільеў. - Ператрус праводзіўся ў адпаведнасці з пастановай старэйшага следчага следчага аддзела УКДБ па г. Мінску і Мінскай вобласці капітана юстыцыі Дарашэвіча па справе 10011110362 (крымінальная справа "Аб масавых беспарадках" па ч. 1 і ч. 2 арт. 293 КК Беларусі). У ходзе правядзення ператрусу ў маёй кватэры з пісьмовага стала ў сына-школьніка для нечага забралі чыстыя нататнікі і сшыткі з сімволікай кампаніі «Гавары праўду!», Акрамя таго, канфіскавалі інфармацыйныя матэрыялы, якія тычацца выбараў прэзідэнта ЗША ў 2008 г., дыск з творамі В. П. Някляева і аб'явы аб сустрэчы В. П. Някляева з выбаршчыкамі г. Барысава, напульснік з надпісам «За Свабоду!» і некалькі ДВД і СД дыскаў».

У пастанове аб правядзенні вобыску было сказана пра «прылады злачынства, прадметы, дакументы і каштоўнасці, якія могуць мець значэнне для расследавання крымінальнай справы аб масавых беспарадках. Ці варта сумнявацца, што ніякага дачынення да пералічаных катэгорыях рэчыўных доказаў канфіскаваныя прадметы не маюць. Аднак і па сканчэнні амаль чатырох месяцаў маёмасць не вернута.

У скарзе ў Пракуратуру Мінскай вобласці Васільеў просіць праверыць законнасць пастановы аб правядзенні ператрусу ў яго кватэры, а таксама дзеянняў супрацоўнікаў мясцовай міліцыі. Акрамя таго, дэмактывіст настойвае на вяртанні адабранай маёмасці.

«Праваабарончая хроніка»