Андрэя Пачобута збіраюцца судзіць у закрытым рэжыме

Стала вядома, што гродзенскага публіцыста Андрэя Пачобута збіраюцца судзіць у закрытым рэжыме. Першае судовае паседжанне ў судзе Ленінскага раёну Гродна запланаванае на 14 чэрвеня. Як паведаміла жонка Пачобута Аксана, якая мела чарговае спатканне з мужам, ён атрымаў афіцыйную паперу з абласной пракуратуры, якая просіць суд зрабіць працэс закрытым. Нагадаем, што Андрэя Пачобута вінавацяць у абразе прэзідэнта і паклёпе на яго, якія нібыта змяшчаюцца ў журналісцкіх артыкулах. За гэта публіцысту пагражае ад 2 да 4 гадоў турмы. Ужо два месяцы ён знаходзіцца ў Гарадзенскім СІЗА. Заўтра, 8 чэрвеня, з Пачобутам павінен сустрэцца ягоны адвакат Аляксандар Бірылаў.

“Праваабарончая хроніка”