Рух "За Свабоду" звярнуўся ў МУС у сувязі з нападамі невядомых на мінакоў
Рух "За Свабоду" звярнуўся ў МУС Беларусі ў сувязі з тым, што «апошнім часам фіксуюцца шматлікія факты нападу невядомых грамадзян на мінакоў ў розных гарадах краіны. Людзі ў цывільным, ужываючы грубую фізічную сілу, хапаюць мірных грамадзян і, у некаторых выпадках збіваючы іх, зацягваюць у аўтамабілі, аўтобусы (часцяком без нумароў) або транспартныя машыны спецназа. Пасля гэтага іх дастаўляюць у аддзяленні міліцыі, дзе паведамляюць пра тое, што яны з'яўляюцца затрыманымі ў рамках адміністрацыйнага працэсу".
На думку Руху "За Свабоду", практыка такіх затрыманняў у дачыненні да грамадзян, якія рэалізуюць сваё права на свабоду слова і свабоду мірных сходаў:
- супярэчыць зместу арт. 9 Усеагульнай Дэкларацыі правоў чалавека: "Ніхто не можа быць падвергнуты адвольнаму арышту або затрыманню";
- грубым чынам парушаюць канстытуцыйныя правы і свабоды чалавека;
- у сур'ёзнай ступені пазбаўляе чалавека сродкаў абароны і працэсуальных гарантый справядлівага разбіральніцтва.
У святле выкладзенага вышэй, дзейнічаючы на падставе Статута (пункт 2.1. – "Мэтай ПАГА "Рух "За Свабоду" з'яўляецца абарона правоў і свабодаў чалавека, зафіксаваных у Канстытуцыі Рэспублікі Беларусі і міжнародных дакументах па правах чалавека і асвета грамадзян у гэтай сферы), намеснік старшыні Руху Юрась Губарэвіч звярнуўся ад імя арганізацыі ў МУС Беларусі з наступнымі пытаннямі:
1. Якія законныя сродкі самаабароны могуць быць ужытыя мірнымі грамадзянамі ў дачыненні да невядомых асобаў, якія нападаюць на іх?
2. Якія законныя сродкі самаабароны могуць быць ужытыя мірнымі грамадзянамі ў выпадку, калі нападнікі з'яўляюцца пераапранутымі ў грамадзянскую вопратку супрацоўнікамі падраздзяленняў МУС, але пры затрыманні мірных грамадзян не выконваюць прадугледжаную законам працэдуру затрымання, часам ужываючы пры гэтым фізічную сілу і спецыяльныя сродкі?
3. У выпадку, калі затрыманне мірных грамадзян ажыццяўляюць супрацоўнікі падраздзяленняў МУС, але пры гэтым незаконна прымяняюць фізічную сілу і спецыяльныя сродкі, не выконваюць прадугледжаную законам працэдуру затрымання, якія законныя сродкі самаабароны могуць быць ужытыя мірнымі грамадзянамі ў адказ на заведама незаконныя дзеянні супрацоўнікаў МУС?
Пытанні былі адпраўленыя пакуль праз сайт МУС, неўзабаве будзе зроблены афіцыйны пісьмовы зварот.
