Касацыйную скаргу Фядыніча не задаволілі
Мінскі абласны суд не задаволіў скаргу старшыні прафсаюза РЭП Генадзя Фядыніча на рашэнне Салігорскага раённага суда. Паседжанне адбылося 18 кастрычніка ў прысутансці заяўніка.
Нагадаем, што ў верасні салігорскі суддзя Сяргей Самуйлік прызнаў вінаватым прафсаюзнага лідэра ў парушэнні закона аб масавых мерапрыемствах і пакараў Генадзя Фядыніча штрафам у памеры 700 тысяч беларускіх рублёў. Падставай для прысуду сталі ўлёткі з запрашэннем на Народных сход. Друкаваныя матэрыялы былі знойдзеныя супрацоўнікамі Салігорскай ДАІ ў аўтамабілі старшыні прафсаюза РЭП напярэдадні яго сустрэчы з жыхарамі гораду.
Рашэнне Мінскага абаласнога суда Генадзь Фядыніч пракаментаваў адназначна:
- Будзем абскарджваць у наступнай інстанцыі а потым, у выпадку чарговай адмовы, падаваць скаргу ў Камітэт па правах чалавека ААН.
Акрамя таго спадар Фядыніч паведміў, што ім былі накіраваныя адмысловыя лісты ў Генеральную пракуратуру, Міністэрства ўнутраных спраў і Вярхоўны суд. У лістах ён патрабуе правесьці “лікбез” з работнікамі гэтых ведамстваў адносна ведання імі закону “Аб рэспубліканскіх і мясцовых сходах”.
