Прыёмамі запалохвання карыстаюцца і начальнікі ЖЭСаў

Сябра Саюза пісьменнікаў Беларусі Аляксей Якімовіч жыве адзін у аднапакаёвай кватэры на вуліцы Скарыны ў Слоніме. Калі пачаўся ацяпляльны сезон, ён заўважыў, што батарэя на кухні амаль не ацяпляецца, яна значна халаднейшая, чым у пакоі. З заявай слонімец звярнуўся ў гарадскі ЖЭС.

Прыйшлі работнікі ЖЭСу, паглядзелі, памералі тэмпературу, паабяцалі разабрацца, але так нічога і не зрабілі. Тады спадар Якімовіч сам пайшоў у ЖЭС і папрасіў кнігу скаргаў і прапановаў. Начальнік аварыйнай службы Сяргей Лушчык папрасіў яго не пісаць скаргу, бо сам асабіста разбярэцца. Прайшоў час, але ніхто і пальцам не кіўнуў на просьбу пісьменніка. А Лушчык, замест дапамогі, пагрозліва сказаў, што Аляксея Якімовіча аштрафуюць за “неабгрунтаваны” выклік аварыйнай службы альбо забяруць яго, як ”некаторых з плошчы ў Мінску”.

Тады Аляксей Якімовіч напісаў скаргу ў пракуратуру Слонімскага раёна  і ў Слонімскі райвыканкам на спадара Лушчыка і на работу ЖЭСу. А таксама напісаў пра сваю цяганіну ў “Газету Слонімскую”. Сітуацыю з ацяпленнем кватэры слонімскага пісьменніка пацвердзілі іншыя жыхары вуліцы Скарыны. Канфлікт працягваецца.