Актывістак FEMEN зьбілі, абстрыглі і без дакумэнтаў кінулі ў лесе

12:00  У амбасадзе Ўкраіны ў Менску нічога ня ведаюць пра месца знаходжаньне актывістак жаночага руху Femen Іны Шаўчэнкі, Аксаны Шачко і Аляксандры Нямчынавай. Супрацоўнік кансуляту ў размове са «Свабодай» заявіў, што ніякімі дадзенымі адносна грамадзянак Украіны яны не валодаюць. Пасьля ўчорашняй акцыі-пэрфомансу на прыступках будынку КДБ дзяўчатам ўдалося зьбегчы ад аховы Камітэту дзяржбясьпекі, але ўвечары тэлефонная сувязь зь імі зьнікла. Пакуль прозьвішчы зьніклых фэмэнак не фігуруюць і ў судовых працэсах над затрыманымі ўчора ўдзельнікамі акцыі ў памяць пра падзеі 19 сьнежня 2010 году.
Міністэрства замежных спраў Беларусі гэтаксама не пацьвярджае факт затрыманьня ці арышту грамадзянак Украіны.
Кіраўнік прэс-службы Дзяржаўнага памежнага камітэта Беларусі Аляксандр Цішчанка заявіў Інтэрфаксу, што «па зводцы не праходзіла інфармацыя аб затрыманьні на мяжы гэтых грамадзянак».
Начальнік Цэнтра інфармацыі і грамадзкіх сувязяў КДБ Аляксандр Антановіч назваў акцыю FEMEN «грубай сплянаванай правакацыяй».

19:20 Жыхары вёскі Бякі Ельскага раёну пацьвярджаюць, што 20 сьнежня пад вечар украінскія жанчыны, удзельніцы эпатажнага флэш-мобу ў Менску, сапраўды прыйшлі да іх у вёску. Яны былі зьняможаныя. Мясцовы жыхар спадар Юры даў ім свой тэлефон, каб украінкі змаглі датэлефанавацца да знаёмых і паведаміць пра сваё месца знаходжаньня.
Пасьля гэтага мясцовы жыхар Аляксандар прапанаваў ім зайсьці ў сваю хату, каб напаіць гарбатай. Жанчыны пагадзіліся.
У Ельскім райаддзеле міліцыі ў 16:45 нічога ня ведалі пра ўкраінак. Аднак прыкладна праз гадзіну прадстаўнік Скараднянскага сельсавету паведаміў, што ў Бякі выехала апэратыўная міліцэйская група зь Ельску, каб на месцы высьветліць, што здарылася з украінскімі грамадзянкамі.

Адна зь лідэраў руху FEMEN Ганна Гуцал заявіла Свабодзе:

«Яны жывыя, але не здаровыя і вельмі наляканыя, іх учора захапілі КДБ, усю ноч вазілі іх у машыне, потым вывезьлі ў лес, аблілі алеем, пагражалі падпаліць, потым пагражалі нажом, нажом рэзалі валасы, кавалкамі з галавы зразалі, здымалі гэта ўсё на відэакамэру, пакінулі іх у лесе. Яны вось зараз дабраліся да вёскі Бякі́ Ельскага раёну Гомельскай вобласьці, яны пабітыя, у іх забралі дакумэнты. Зараз амбасадар Украіны і консул выяжджаюць на месца.

«Яны папрасілі скарыстацца тэлефонам у жыхароў гэтай вёскі і пазванілі нам. Зараз яны хаваюцца ў доме, і таму мы ня можам вам сказаць, які дом і як завуць гэтага чалавека. Яны вельмі баяцца.
Я думаю, што нам удасца іх вярнуць на радзіму. І мы будзем рабіць усё, каб амбасадара Беларусі ў Кіеве дэпартавалі адсюль, і калі ён не паедзе заўтра ж, мы самі яго завязём у лес і паголім налыса», — зазначыла Ганна Гуцал.
«Гэта былі дакладна не хуліганы», — заявіла Ганна Гуцал Свабодзе.

У амбасадзе Ўкраіны паведамілі, што консул і яшчэ адзін супрацоўнік амбасады выехалі ў Гомельскую вобласьць.
Прэсавы сакратар МУС Канстанцін Шалькевіч паведаміў Свабодзе, што ніякай інфармацыі пра трох дзяўчат з Femen у яго няма. А прэсавы сакратар КДБ Аляксандар Антановіч адказаў: «Без камэнтароў».

Напярэдадні вечарам Іна Шаўчэнка, Аксана Шачко і Аляксандра Нямчынава перасталі выходзіць на сувязь. Як паведаміла БелаПАН лідэр руху Ганна Гуцал, з 20:00 па менскім часе іх тэлефоны адключаныя. «Мы ўжо зьвярнуліся ва ўкраінскую амбасаду ў Менску», — сказала яна. Гуцал не выключае, што дзяўчат маглі ўсё ж затрымаць праваахоўныя органы Беларусі.

Не выходзіць на сувязь і відэаапэратар FEMEN грамадзянка Аўстраліі Кіці Грын. Пасьля затрыманьня Грын была дэпартаваная ў Вільню.

22.30 Прадстаўнік украінскай амбасады Аляксей Емельяненка паведаміў Радыё Свабода, што пасьля 22 гадзіны ён і украінскі консул прыбылі ў РАУС Ельскага раёну Гомельскай вобласьці, дзе знаходзяцца актывісткі Femen. Паводле словаў Емельяненкі, асаблівых зьнешніх прыкметаў гвалту  на іх ня бачна, а толькі адрэзаныя валасы. Дзяўчаты скардзіліся, што іх білі палкамі па ягадзіцах. Міліцыя высьвятляе асобы дзяўчат, паколькі ў іх няма ніякіх дакумэнтаў.
«Мы спадзяемся, што іх неўзабаве ўдасца вярнуць ва Ўкраіну і будзем на месцы сачыць за іх лёсам», — сказаў Аляксей Емельяненка.
Дзе дзяўчаты будуць начаваць пакуль нявырашана.

23.46  Як перадае з месца падзеяў карэспандэнт БелаПАН, міліцыянты адвезьлі дзяўчат у Ельскі раённы шпіталь, дзе яны прайшлі мэдагляд. У бальніцы значных пашкоджаньняў у іх не выявілі, у асноўным - гематомы на руках і іншых частках цела. У момант калі міліцыя выводзіла актывістак з лякарні, журналістам удалося зрабіць фота і задаць некалькі пытаньняў дзяўчатам. Прадстаўніцы FEMEN  паведамілі, што былі затрыманыя ўвечары 19 сьнежня на Усходнім аўтавакзале ў Мінску. Іх затрымлівалі шасьцёра мужчын, якія не прадставіліся, але адразу ж насунулі шапкі на вочы актывісткам і павезьлі іх у невядомым кірунку. Па словах дзяўчат, у выніку іх вывезьлі ў лес, дзе пагражалі і ўсяляк зьдзекаваліся, прымушалі распранацца дагала, аблілі галавы зялёнкай, прымушалі трымаць плякаты з фашысцкай свастыкай. Усё гэта здымалася на відэакамэру. У актывістак FEMEN  адразу ж пры затрыманьні забралі мабільныя тэлефоны і дакумэнты. У выніку яны апынуліся ў паўтары кілямэтрах ад украінскай мяжы, выйшлі да вёскі Бекі, дзе зьвярнуліся да мясцовых жыхароў.

0:49 Аляксандру Нямчынаву, Іну Шаўчэнка і Аксану Шачко вывезьлі консульскім аўто зь Ельскага РАУСу. Машына скіравалася ў бок украінскай мяжы, да памежнага пераходу Новая Рудня, паведамляе «Наша ніва».