Аршанскія электрасеткі: пасля хваляванняў рабочых дырэкцыя атрымала вымову
Пасля таго, як на незалежных інфармацыйных сайтах з’явілася інфармацыя аб тым, што 52 работнікі Аршанскага філіялу электрасетак напісалі заяву аб выхадзе з дзяржаўнага прафсаюзу, гэтым выпадкам зацікавілася мясцовая Пракуратура і КДБ.
Нагадаем, што работнікі Аршанскіх электрасетак, пасля таго, як заўважылі ў сваіх разліковых квітках адсутнасць налічэнняў за шкодныя ўмовы працы, склалі калектыўную заяву аб выхадзе з дзяржаўнага прафсаюзу. Яе падпісалі 52 работнікі. Рабочыя патрабавалі тлумачэнняў з боку адміністрацыі, на што ім сказалі, што скасаванне выплат за шкодныя ўмовы працы адбывалася ў іх філіяле ў якасці эксперыменту. Гэты эксперымент далей планавалася пашырыць на тэрыторыі ўсёй вобласці.
“Нас пачулі толькі тады, калі інфармацыя аб свавольствах нашай адміністрацыі выйшла за межы прадпрыемства і стала агульнавядомай ва ўсёй краіне, - гаворыць рабочы Юрый, - Недаплачаныя грошы за шкодныя ўмовы працы за мінулы месяц нам павінны выдаць у гэтым. Нам таксама стала вядома, што за сваю ініцыятыву сэканоміць на грашовых выплатах рабочым ужо дэпрэміравана шэраг начальнікаў Аршанскага філіялу электрасетак, у тым ліку дырэктар. Усе яны атрымалі за свае дзеянні вымову. Кіраўнік электрасетак па Віцебскай вобласці забараніў надалей праводзіць такія эксперымнеты”.
Юрый адзначае, што пасля гэтага выпадку, каб залагодзіць работнікаў, кожнаму з іх на 23 лютага была выдадзена па 250 тысячаў рублёў, чаго ніколі не было раней.
“Пасля таго, як мы заявілі пра сябе, усіх бунтароў пачалі кантраляваць. Цяпер выхад на абед строга па раскладу – ні раней, ні пазней нельга, бо лічыцца парушэннем. У абедзенны час забаронена на машынах выязджаць з тэрыторыі прадпрыемства. Усе вадзіцелі, якія выязджаюць за межы тэрыторыі прадпрыемства, цяпер едуць у суправаджэнні некага з кіраўніцтва. Новаўвядзеннем з’яўляецца тое, што ўсім у канцы працоўнага дня робюць алкатэст. Дырэктар аддаў нефармальны загад начальнікам як мага мацней заціскаць гайкі ў дачыненні да рабочых за дастаўленыя яму непрыемнасці”, - адзначае Юрый.
Тым часам рабочы кажа пра тое, што зараз працуе камісія з Мінску, якая займаецца атэстацыяй працоўных месцаў. Акрамя таго, бугалтэрыю прадпрыемства правярае пракуратура і КДБ.
“Рабочыя не разгубіліся ў гэтай сітуацыі і кажуць пра тое, што калі іх начальнікі занялі прынцыповую пазіцыю ў дачыненні да іх – за імі таксама не заіржавее. Вадзіцелі абяцаюць, што цяпер ні адзін з начальнікаў у працоўны час не будзе па дарозе на службовым транспарце заязджаць па сваіх справах у розныя месцы, крамы, дахаты і г.д. Акрамя гэтага, кіроўцы дамовіліся, што нават калі будзе скончаны працоўны дзень і неабходна ставіць машыны ў гаражы на тэрыторыі прадпрыемства начальнікаў сваіх будуць адвазіць на тэрыторыю электрасетак, а не дадому, як было раней. І самае галоўнае – у Віцебскай вобласці часта бываюць бураны, ад чаго рвуцца электрычныя лініі, а вазіць рамонтнікаў прыходзіцца тым жа самым вадзіцелям у выходныя і святочныя дні. У сувязі з гэтым рабочыя адзначаюць, што ў іх падчас наступнага бурану могуць адключыцца мабільныя тэлефоны і хто тады завязе рамонтнікаў да месцаў абрыву? Прыдзецца чакаць працоўнага дня альбо шукаць іншыя магчымасці”, - адзначае Юрый.
“Рабочых абурыў яшчэ адзін выпадак, які ўсплыў не так даўно. Начальніку гаража на аперацыю на назе кіраўнік прафсаюзу выдаткаваў 9 міліёнаў рублёў. У той жа самы час рабочаму, які захварэў і не можа зараз хадзіць, было выдадзена матэрыяльнай дапамогі ўсяго 200 тысяч рублёў. Дзе ж тут справядлівасць? Кіраўнік прафсаюзу пасля таго, як мы ўзбунтаваліся, пачаў заўважаць нас як людзей, цярэцца ўвесь час з намі, высвятляе нашыя настроі і ўвесь час наракае, як жа мы яго падставілі. А ці не задумываўся ён над тым, што сам быў звычайным рабочым, пакуль мы яго не выбралі кіраўніком прафсаюзнай арганізацыі і ён пачаў ужо абараняць не нашыя правы, а займацца тым, як каго з адміністрацыі адправіць у Кіеў ці яшчэ куды на экскурсію і як каму з кіраўніцтва выдаць зверх меры матэрыяльную дапамогу. Хіба гэта нармальны прафсаюзны лідар?”, - абураецца Юрый.
