Права на выезд за межы Беларусі Валянцін Стэфановіч будзе бараніць у судзе

Намесьнік Праваабарончага цэнтру “Вясна” Валянцін Стэфановіч, якому быў абмежаваны выезд за межы Беларусі, будзе абскарджваць гэтае рашэньне ў судзе Цэнтральнага раёна Менска.  

Паколькі ў аддзеле па грамадзянстве і міграцыі праваабаронцу паведамілі, што ягонае прозвішча  ўнесенае ў сьпіс невыяздных па прычыне “ухіленьня ад мерапрыемстваў па прызыву”, ён просіць суд прызнаць дзеяньні Міністэрства абароны Рэспублікі Беларусь, неправамоцнымі.

Ён лічыць падставы для абмежаваньня права на выезд з Рэспублікі Беларусь абсурднымі і відавочна незаконнымі.

"Па-першае, я на 12 гадоў старэй, чым максімальны прызыўны ўзрост, які устаноўлены дзеючым заканадаўствам, а па-другое, я ўжо праходзіў тэрміновую вайсковую службу ў 1990-92 гг." -- паведамляе прваабаронца

Стэфановіч просіць таксама абавязаць Міністэрства абароны ліквідаваць дапушчанае парушэньне і падаць звесткі ў органы МУС аб выключэньні яго з банку дадзеных аб грамадзянах Беларусі, права на выезд якіх за межы рэспублікі  часова абмежаванае ў сувязі з іх несапраўднасьцю.

Адначасова праваабаронца накіраваў скаргу ў Генеральную пракуратуру. Ён просіць устанавіць асобаў, якія прынялі неправамернае рашэньне аб абмежаваньні ягонага права на выезд з Рэспублікі Беларусь,а таксама прыняць неадкладныя меры па аднаўленьні парушаных правоў.

11 сакавіка Валянцін Стэфановіч не змог выехаць зь Беларусі. На беларуска-літоўскай мяжы ў пункце пропуску “Каменны Лог” супрацоўнікі памежнай службы паведамілі, што яму адмоўлена ў выезьдзе.

На сёньняшні дзень вядома 13 прозвішчаў тых, каму забаронены выезд з Беларусі. 21 сакавіка Вінцук Вячорка разам з 14-гадовай дачкой Ружанай быў спынены на мяжы ў Брэсце. Яму паведамілі, што прозвішча занесенае ў сьпіс невыяздных.