Ян Дзяржаўцаў судзіцца з трыма райвыканкамамі
Віцебскі сябар КХП БНФ падаў заявы ва ўсе тры раённыя суды гораду, бо з трох раённых адміністрацый яму прыйшлі адмовы на правядзенне пікетаў. Гэта своеасаблівы рэкорд -- калі актывіст адначасова судзіцца з трыма органамі ўлады. Зрэшты, колькасць забароненых пікетаў таксама была рэкордная – 15 на працягу 5 дзён.
Сябар КХП БНФ Ян Дзяржаўцаў хацеў правесці пікеты з інфармацыйнымі мэтамі: ён замаўляў іх на тэрмін з 21 па 25 лютага – якраз гэтымі днямі ў Віцебску судзілі яго аднапартыйца Сяргея Каваленку:
"Я падаваў заяўкі ў Кастрычніцкую, Першамайскую і Чыгуначную раённыя адміністрацыі, прасіў дазволу на пікеты ў тых месцах, якія вызначылі ўлады. Збіраўся штодня праводзіць па тры пікеты – у кожным з раёнаў у розны час. Але мне адмовілі. Першая прычына, як мне напісалі, гэта "немэтазгоднасць". Другая – што не было папярэдніх дамоваў з ЖКГ, хуткай дапамогай і міліцыяй".
Адмовы Ян Дзяржаўцаў лічыць парушэннем свайго права на выказванне ўласнай палітычнай пазіцыі і парушэннем права землякоў на атрыманне незаангажаванай інфармацыі. Таму ён і звярнуўся ў суд – дакладней, ва ўсё тры раённыя суды.
"У Чыгуначным райсудзе ўжо прайшло папярэдняе слуханне. Я двойчы заяўляў хадайніцтва аб адводзе суддзі Святлане Варатынскай, бо яна відавочна падтрымлівае пазіцыю дзяржаўных структураў. Паўнавартасны судовы працэс прызначаны на 9 красавіка. А ўчора папярэднія слуханні былі ў Кастрычніцкім райсудзе, там разглядаць справу прызначылі суддзю Алену Папкову. Суд па маёй скарзе абудзецца 30 сакавіка", -- распавёў Ян Дзяржаўцаў.
У Першамайскі райсуд актывіст падаў крыху іншую скаргу – на тое, што пра забарону пікетаў яму адказалі па-руску. Хаця ў апошняй рэдакцыі закону аб зваротах грамадзян гаворыцца, што адказы мусяць быць напісаны на мове, якой карыстаўся заяўнік. Сваё гарантаванае законам права на беларускамоўныя адказы ад чыноўнікаў Ян Дзяржаўцаў будзе бараніць у судзе заўтра, 28 сакавіка.
