Прэзідэнцкая адміністрацыя ігнаруе беларускую мову
Віцебскі сябар КХП БНФ Ян Дзяржаўцаў, патрабуючы, каб чыноўнікі адказвалі на яго звароты па-беларуску, дайшоў да прэзідэнцкай адміністрацыі. І адтуль яму таксама даслалі адказ на рускай мове.
Ян Дзяржаўцаў адзначае, што права атрымліваць адказы на той мове, на якой ён звяртаецца да чыноўнікаў, гарантавана яму артыкулам 18 Закону Рэспублікі Беларусь «Аб зваротах грамадзян і юрыдычных асоб», які ўступіў у сілу 22 студзеня 2012 году. Там гаворыцца, што «пісьмовыя адказы на пісьмовыя звароты афармляюцца на мове звароту».
Тым не менш, адказы з раённых адміністрацый на свае заяўкі наконт правядзення пікетаў, якія атрымлівае сябар КХП БНФ, напісаны па-руску. Спадар Дзяржаўцаў звярнуўся з гэтае нагоды са скаргай у віцебскі аблвыканкам, але там яму працытавалі закон аб зваротах грамадзян у састарэлай рэдакцыі. А з пракуратуры Першамайскага раёну актывісту напісалі, што пісьмовая заяўка на пікет зваротам увогуле не лічыцца.
Ян Дзяржаўцаў звярнуўся ў прэзідэнцкую адміністрацыю. І атрымаў ліст, дзе начальнік галоўнага ўпраўлення па працы са зваротамі грамадзян і юрыдычных асоб Станіслаў Буко праінфармаваў актывіста, што ягоны зварот накіраваны ў Нацыянальны цэнтр заканадаўства і прававых даследаванняў Рэспублікі Беларусь. Адтуль мусіць прыйсці адказ, ці кожны зварот да ўладаў – гэта той самы "зварот", пра які гаворыцца ў законе «Аб зваротах грамадзян і юрыдычных асоб». Чыноўнік з адміністрацыі Станіслаў Буко таксама адказаў віцебскаму актывісту на рускай мове, што выклікала новую хвалю абурэння ў Яна Дзяржаўцава:
“Калі службовая асоба такога рангу дазваляе сабе ігнараваць патрабаванні заканадаўства, дык чаго ж тады можна чакаць ад мясцовых чыноўнікаў? Невядома, навошта ўлады прымаюць такія законы, якія самі не збіраюцца выконваць”.
