Брэсцкія ўлады забаранілі ўсе пікеты “За сумленныя выбары без Лукашэнкі”

Пяць акцый былі заяўлены на 15 мая мясцовымі актывістамі Аб'яднанай грамадзянскай партыі, каб прыцягнуць увагу жыхароў горада да адсутнасці ў краіне свабодных і сумленных выбараў, а таксама праінфармаваць пра пачатак кампаніі АГП пад той жа назвай, што і  згаданыя пікеты.
Як распавёў старшыня брэсцкай абласной структуры АГП Уладзімір Вуек (на фота), пікеты былі забаронены нават у тых месцах, якія гарвыканкам вызначыў для правядзення масавых мерапрыемстваў. Так, у правядзенні пікету ў парку воінаў-інтэрнацыяналістаў было адмоўлена на той падставе, што там у гэты час будзе адбывацца святочная праграма з нагоды Дня сям'і, а забарона аналагічнай акцыі на стадыёне “Лакаматыў” абумоўлена нібыта прызначанай на той жа час гульні ў рамках адзінага “Тыдня футбола”. Што тычыцца пікета каля супермаркета “Алмі”, дык ён не дазволены па звыклай прычыне: гэта месца не вызначана гарвыканкамам для масавых мерапрыемстваў.
Уладзімір Вуек лічыць падставы для забароны акцый неабгрунтаванымі і такім чынам брэсцкія ўлады парушылі правы актывістаў АГП на мірныя сходы і мітынгі, якія замацавана Канстытуцыяй Беларусі. Таму заяўнікі акцый маюць намер абскардзіць іх забарону ў судзе.