Падпалкоўнік Пракуда: баранавіцкіх актывістаў затрымлівалі “законна”
Грамадскі актывіст Рыгор Грык атрымаў пісьмовы адказ з Баранавіцкага аддзялення ўнутраных спраў на транспарце за подпісам падпалкоўніка Пракуды В.І. Раней мы паведамлялі, што 6 мая актывіст зрабіў запіс ў кнізе скаргаў і прапаноў ГАУС на транспарце на дзеянні капітана міліцыі Анатоля Чыкуна. У сваёй скарзе ён напісаў, што 1 мая збіраўся ехаць у Мінск па асабістай справе, але быў затрыманы на станцыі Баранавічы-Цэнтральныя па падазрэнні наяўнасці выбуховых рэчываў.
– Мне пісьмова паведамілі, што супрацоўнікі транспартнай міліцыі дзейнічалі ў адпаведнасці с законам,– паведаміў Рыгор Грык. – Ну як жа ў адпаведнасці с законам, калі мне не патлумачылі правы і не выдалі пратакол дагляду. Ніхто не гаворыць, за што мяне пратрымалі ў міліцыі амаль тры гадзіны, калі сумку можна было праверыць за адну хвіліну. Таксама маўчаць, што я патрабую кампенсацыю за маральныя і матэрыальныя страты, бо ў Мінск я спазніўся і не прыняў удзел у запланаваным мерапрыемстве. Таму цяпер я буду звяртацца ў пракуратуру на транспарце, каб пракурор даў прававую ацэнку дзеянням супрацоўнікаў міліцыі,- патлумачыў Рыгор Грык.
