У Вышэйшым гаспадарчым судзе адбываецца судовае пасяджэнне па зыску рэдакцыі часопіса “ARCHE. Пачатак” да Міністэрства інфармацыі

Рэдакцыя часопіса “ARCHE” патрабуе праз суд адмяніць папярэджанне аб парушэнні закону і загад аб прыпыненні выхаду выдання.

Нагадаем, 19 верасня загадам міністра інфармацыі быў прыпынены на тры месяцы выхад часопіса “ARCHE”. Мінінфармацыі сцвярджае, што, надрукаваўшы артыкулы грамадска-палітычнага характару, часопіс змяніў тэматыку і не паведаміў аб гэтым своечасова для ўнясення адпаведнага змянення ў рэгістрацыйнае пасведчанне.

Калектыў часопіса ў сваёй зыскавай заяве спасылаецца на Закон аб друку, дзе вызначана, што падчас рэгістрацыі выдання ўказваецца прыкладная, а не дакладная тэматыка, паведаміла прэс-служба БАЖ.