“Вясна” запрашае!

26 лістапада ў 10 гадзін раніцы будуць канфіскаваныя офіс і маёмасць Праваабарончага цэнтру “Вясна”. Судовыя выканаўцы апячатаюць памяшканьне, у якім 12 год аказвалася дапамога рэпрэсаваным грамадзянам, праводзіліся прэс-канферэнцыі па актуальных пытаннях парушэнняў правоў чалавека, ладзіліся шматлікія праваабарончыя мерапрыемствы. Такім чынам улады “адзначаюць” гадавіну прысуду старшыні Праваабарончага цэнтру “Вясна” Алесю Бяляцкаму, які 24 лістапада 2011 года быў асуджаны да чатырох з паловай гадоў пазбаўлення волі нібыта за нявыплату падаткаў.

У апошні дзень працы ў канфіскаваным офісе супрацоўнікі Праваабарончага цэнтру “Вясна” запрашаюць з 9 да 10 гадзін раніцы журналістаў, калег- праваабаронцаў і ўсіх тых, каму ў “Вясне” было сапраўды ўтульна і спагадна, разам правесці гэты час. Затым сябры Рады ПЦ "Вясна правядуць невялікі брыфінг.

Адрас: пр. Незалежнасці, 78а