Дзіцячага ўрача Ігара Пастнова звальняюць за крытыку старшыні Віцебскага аблвыканкаму

Ігар Пастноў ужо працяглы час крытыккуе Аляксандра Косінца за марнатраўства бюджэтных грошай ды заняпад службы аховы здароўя на Віцебшчыне. І гэта ўжо не першае звальненне спадара Пастнова: два гады таму яго звольнілі з пасады школьнага ўрача ў горадзе. Давялося перайсці на цяжэйшую працу з меншым заробкам, але і тут не ўдалося затрымацца надоўга.
27 лістапада Ігару Пастнову прад'явілі папярэджаньне, што кантракт з ім не будзе працягнуты. Прычым – без аніякіх тлумачэнняў, падкрэслівае ўрач:

"На мой погляд, гэта яўнае парушэнне працоўных правоў. І трэба неяк уносіць змены ў заканадаўства, каб працадаўца ўсё ж быў вымушаны тлумачыць, чым яму не падыходзіць работнік. Мне нічога не патлумачылі, і гэта дае падставы меркаваць, што галоўную прычыну я ведаю. Думаю, гэта мая крытыка "хворых месцаў" віцебскай медыцыны. Публічная крытыка – і скаргі ў вышэйшыя інстанцыі, і выступы ў незалежных СМІ"

Спадар Пастноў перакананы, што дзяржаўных сродкаў, якія ідуць на медычныя аб'екты, яўна недастаткова:

"Калі да ўлады прыйшоў Аляксандр Косінец, я думаў, што ён добра ведае патрэбы віцебскай медыцыны. Ён сам прафесар, працаваў ва ўрадзе, курыраваў менавіта "сацыялку" . Але ж ён заняўся паказухай: плошчы, плітка, асвятленне вуліц штодня як на Новы год, лядовыя палацы… А грошай на рамонт інфекцыйнай бальніцы няма,   хірургічны корпус анкалагічнай бальніцы недабудаваны, і ўсё ж крычаць, што мы абавязкова мусім дабудаваць лядовы палац у Воршы. Пра ўсё гэта я пісаў паўсюль, нават у адміністрацыю Прэзідэнта. Бо я перакананы: каб Аляксандр Лукашэнка пра такое стаўленне ведаў, ён бы гэтага не цярпеў. Але ж усе скаргі з Мінску "спускаюцца" зноў у аблвыканкам, да Косінца, а з такой сістэмай хіба можна нешта зрушыць з месца?"

У паліклініку, дзе працуе Ігар Пастноў, прыходзілі "людзі ў цывільным". Гэта здарылася неўзабаве пасля таго, як урач даў інтэрвію тэлеканалу "Белсат". Потым, ён кажа, супраць яго ў інтэрнэце пачаліся правакацыі: нехта размясціў брыдкія каментары, падпісаўшыся  ягоным імем:

"Я кампутарам не карыстаюся ўвогуле, не ўмею. Таму мае калегі мне паверылі, што гэта рабіў не я. І калі нехта думае, што я толькі і займаюся тым, што крытыкую, то і гэта не так. Я перадусім урач, і праца не з лёгкіх: я езджу па раёне, прымаю дзяцей па вясковых ФАПах. 40 кіламетраў у адзін бок, 40 у другі, і транспартныя выдаткі ніхто не аплочвае. Заробак у мяне ўсяго1 мільён 800 тысяч рублёў, магу паказаць квіток! Мяне, пэўна, на такую працу і накіроўвалі, бо думалі – не вытрымаю. Але я ўсё стараюся рабіць шчыра і аддана. Можаце запытацца ў вяскоўцаў: яны гавораць, што будуць збіраць подпісы, каб мяне не звальнялі".

Ігар Пастноў ведае, што ў медычных установах Віцебшчыны, асабліва ў раёнах, кваліфікаваных кадраў не хапае катастрафічна. Тым не менш, рашэнне, каб не працягнуць з ім кантракт, ужо ёсць.