Кааліцыя аршанскіх дэмсілаў атрымала ліст ад Алеся Бяляцкага
Алесь Бяляцкі
Напярэдадні навагодніх і калядных святаў Аршанская кааліцыя накіравала віншавальныя лісты дванаццаці беларускім палітычным вязням. Акрамя віншаванняў пажадалі ўсім сілы духа, вытрымкі і веры ў лепшую будучыню для новай Беларусі. Ліст падпісалі прадстаўнікі дзевяці палітычных партый і ініцыятываў.
У мінулыя выходныя прыйшоў першы адказ – віншавальная паштоўка ад Алеся Бяляцкага.
“Шаноўныя сябры! Дзякуй вялікі за віншаванне! Я вельмі рады, што вы трымаецеся разам. Я перакананы, што толькі талакою можна пабудаваць што-небудзь вартае ў нашых складаных палітычных умовах. Жадаю ўсім добрага здароўя, сталага розуму і юнацкага запалу!
Шчасця і радасці ў новым годзе! Ад вашай актыўнасці і ініцыятыўнасці шмат што залежыць.
Да сустрэчы,
Алесь Бяляцкі 09 студзеня 2013 г. Бабруйск”.
