Акцыя ў падтрымку зняволеных кіраўнікоў FIDH
Беларускія праваабаронцы ў падтрымку Набіла Раджаба. Наваполацк
Наваполацкія актывісты правялі акцыю ў падтрымку міжнароднай кампаніі ў абарону Набіла Раджаба, намесніка генеральнага сакратара Міжнароднай федэрацыі за правы чалавека (FIDH), асуджанага ў Бахрэйне на два гады пазбаўлення волі за выступы ў абарону права на мірныя сходы.
Гэтак жа, як паведамляе “Свабодны рэгіён” яны падтрымалі і нашага беларускага палітвязня Алеся Бяляцкага, які з'яўляецца віцэ-прэзідэнтам FIDH і міжнародная
дзейнасць якога заўсёды была накіравана на ўмацаванне салідарнасці праваабаронцаў.
Нагадаем, Міжнародная федэрацыя за правы чалавека (FIDH), якая не аднойчы выступала ў падтрымку беларускіх праваабаронцаў у рамках Абсерваторыі па абароне праваабаронцаў, звярнулася да праваабаронцаў з заклікам падтрымаць Набіла Раджаба, нашага калегу з Бахрэйна, пазбаўленага волі за выступы ў абарону права на мірныя сходы.
Прэзідэнт Бахрэйнскага цэнтра за правы чалавека (БЦПЧ) і Цэнтра за правы чалавека ў Затоцы (ЦПЧЗ), намеснік генеральнага сакратара FIDH Набіл Раджаб адбывае двухгадовы тэрмін зняволення ў турме «Джо». 11 снежня 2012 года Апеляцыйны суд Бахрэйна пацвердзіў вынесены Раджабу прысуд па абвінавачванні ў арганізацыі і ўдзеле ў трох несанкцыянаваных мірных сходах.
