Павел Вінаградаў запрасіў лідараў апазіцыі сустрэць яго з "сутак"

Ён лічыць, што лідары апазіцыі і грамадзянскай супольнасці павінны выказаць салідарнасць з асуджанымі.

Нагадаем, што 23 красавіка Вінаградава асудзілі на 12 сутак. Суд прызнаў незаконным пікетам вывешаны каля метро партрэт палітвязня Мікалая Статкевіча і бел-чырвона-белы сцяг.

На волю Вінаградаў павінен выйсці ў суботу 4 траўня каля 17.30. За кратамі ён адзначыць сваё 25-годдзе. У сваім блогу на "Беларускім партызане" актывіст заявіў, што апошнім часам у апазіцыйных колах зменшылася салідарнасць. Ён запрапанаваў лідарам паказаць прыклад. Вінаградаў чакае пабачыць на выхадзе прынамсі Віталя Рымашэўскага, Уладзіміра Мацкевіча, Уладзіміра Някляева, Анатоля Лябедзьку, Аляксандра Мілінкевіча, Аляксея Янукевіча, Вольгу Карач, Ірыну Вештард і Сяргея Калякіна. На яго думку, усе яны мусяць паказаць сваю салідарнасць на справе, а не на словах.