У Беларусь прыедзе Дунья Міятавіч
Дунья Міятавіч
3-га чэрвеня ў Мінску адбудзецца семінар-трэнінг для беларускіх журналістаў «Інтэрнэт-СМІ: свабода, прафесіяналізм і ўстойлівае развіццё».
Як паведамляецца на сайце беларускага МЗС, мерапрыемства ладзяць Офіс Прадстаўніка АБСЕ па пытаннях свабоды СМІ сумесна з Міністэрствам замежных спраў Рэспублікі Беларусь «і іншымі зацікаўленымі ведамствамі».
Па інфармацыі ГА «БАЖ», арганізатары плануюць запрасіць да ўдзелу ў мерапрыемстве прадстаўнікоў як дзяржаўных, так і недзяржаўных СМІ.
Сярод заяўленых тэм сустрэчы:
– «Тэндэнцыі інтэрнэту: што нас чакае ў найбліжэйшай будучыні?»,
– «Як дасягнуць чытача ў сеціве? Праца з лакальнай аўдыторыяй і новыя паслугі»,
– «Кантэнтная палітыка: кіраўнічыя прынцыпы рэдакцыі па планаванні зместу і збору інфармацыі. Чым адрозніваецца сеціўная журналістыка ад традыцыйнай?»,
– «Прасоўванне навінавага сеціўнага выдання на рынку: маркетынгавыя камунікацыі і прыцягненне рэкламадаўцаў. Фінансавая ўстойлівасць сеціўных СМІ: як навінавыя парталы могуць прыносіць прыбытак?»,
– «Журналістыка дадзеных»,
– «Цярпімасць і адсутнасць дыскрымінацыі ў сеціве. Як быць з каментарамі карыстальнікаў?».
Трэнерамі на семінары выступяць украінскія эксперты.
Пра іншыя мерапрыемствы ў межах гэтага візіту Дуньі Міятавіч у Мінск не паведамляецца.
У мінулы раз прадстаўніца АБСЕ па свабодзе СМІ наведвала Беларусь у кастрычніку 2010 года.
Тады яна таксама ўдзельнічала ў круглым стале на тэму развіцця беларускага сегменту інтэрнэт, які ладзіла Бюро АБСЕ сумесна з Мінінфармацыі. Акрамя гэтага, яна сустрэлася з кіраўнікамі ГА «БАЖ», журналісткамі Наталляй Радзінай, Ірынай Халіп, Марынай Коктыш і Святланай Калінкінай і іншымі вядомымі асобамі.
Пачынаючы з 2011 года спн. Міятавіч некалькі разоў казала, што разлічвае ў хуткім часе зноў наведаць Мінск, каб сустрэцца з рэпрэсаванымі журналістамі, але беларускія ўлады адмаўляюць ёй у візе.
