Магілёў: актывіст БХД абскардзіў папярэджанне за дзейнасць ад імя незарэгістраванай арганізацыі ў касацыйным парадку
Сёння, 22 ліпеня, Алег Аксёнаў падаў касацыйную скаргу ў калегію па грамадзянскіх справах Магілёўскага абласнога суда.
Актывіст аргкамітэта партыі “Беларуская хрысціянская дэмакратыя” хоча, каб было адменена рашэнне суда Ленінскага раёна ад 10 ліпеня 2013 года і вынесенае яму Магілёўскай управай КДБ афіцыйнае папярэджанне за дзейнасць ад імя незарэгістраванай арганізацыі, а таксама была прызнана незаконнай адбыўшаяся з ім раней прафілактычная размова з супрацоўнікамі КДБ.
Праз сваю скаргу Алег Аксёнаў таксама просіць суд абавязаць начальніка УКДБ Магілёўскай вобласці прынесці яму пісьмовыя выбачэнні, а супрацоўніка гэтай установы Махунова вусныя за іх незаконныя дзеянні.
Акрамя таго актывіст хоча, каб у адрас Магілёўскай управы КДБ было вынесена прыватнае вызначэнне за дапушчаныя ў адрас яго грубыя парушэнні заканадаўства, спагнана з УКДБ на яго карысць дзяржпошліна ў памеры 150 тысяч рублёў, а таксама каб былі прызнаныя ў вызначаным парадку арт. 193.1 Крымінальнага Кодэкса і ч.3 арт.7 Закона “Аб палітычных партыях”, які забараняе дзейнасць ад імя незарэгістраваных партый, неканстытуцыйнымі.
Нагадаем, што 29 красавіка супрацоўнік КДБ Махуноў выклікаў па позве ў будынак КДБ Алега Аксёнава для прафілактычнай размовы. Падчас “размовы” Махуноў паведаміў, што актывісту вынесена афіцыйнае папярэджанне начальніка УКДБ нібыта за дзейнасць ад імя незарэгістраванай партыі – аргкамітэта Беларускай Хрысціянскай дэмакратыі, а таксама за ўдзел у дзейнасці двух незарэгістраваных у вызначыным парадку арганізацый – грамадзянскай кампаніі “За справядлівыя выбары-2012” і Магілёўскай рэгіянальнай кааліцыі дэмакратычных сіл.
У якасці доказаў супрацоўнік КДБ Махуноў прадаставіў раздрукоўкі з незалежных сайтаў, дзе ўзгадвалася імя і прозвішча актывіста.
На прафілактычным уліку КДБ Алег Аксёнаў знаходзіцца ўжо болей за год. У Магілёве на такім уліку стаяць таксама актывістка БХД Тацяна Шамбалава і лідар Магілёўскай абласной арганізацыі БНФ “Адраджэньне” Зміцер Салаўёў.
