Рашэнне суда: Леаніда Дубаносава звольнілі з парушэннем закону, але на працы не адновяць
Леанід Дубаносаў.
У судзе Лунінецкага раёна 11 верасня вынесена рашэнне ў справе актывіста незалежнага прафсаюзу Леаніда Дубаносава, які лічыць незаконным сваё звальненне з РУП “Граніт”, што знаходзіцца ў Мікашэвічах.
З рашэння суда вынікае, што Дубаносава звольнілі з працы з парушэннем заканадаўства (за што вынесена прыватнае вызначэнне) і ён мае падставы патрабаваць кампенсацыю нанесенай маральнай шкоды. Акрамя таго, адміністрацыя “Граніта” мусіць сплаціць прафсаюзнаму актывісту матэрыяльную дапамагу памерам 1 мільён рублёў.
Разам з тым, старшыня раённага суду Міхаіл Дзенісовіч абвесціў, што выяўленыя парушэнні не з’яўляюцца падставай для аднаўлення Леаніда Дубаносова на працы. Таксама суддзя адмовіў у задавальненні той часткі позвы, якая тычыцца спынення дыскрымінацыі па прафсаюзнай прыналежнасці з боку кіраўніцтва мікашэвіцкага прадпрыемства, на чым настойваў Дубаносаў. На яго карысць не будзе спагнаны з прадпрыемства “Граніт” і працоўны заробак за вымушанага прагулу.
Прадстаўніца Беларускага Кангрэса дэмакратычных прафсаюзаў Алена Яськова , якая дапамагала бараніць інтарэсы Дубаносава у судзе, паведаміла, што ў касацыйным парадку вынесенае рашэнне будзе абскарджана.
