Затрыманні дэлегатаў устаноўчай канферэнцыі па стварэнні каалiцыi "За сумленныя, справядлiвыя выбары для лепшага жыцця" (абнаўляецца)
10.00. У нядзелю, 22 верасня, па дарозе з Гомеля ў Мінск (ад’ехаўшы прыкладна 20 км ад Рэчыцы) быў затрыманы прыватны мікрааўтобус “Фіат” з 8 дэлегатамі ўстаноучай канферэнцыі па стварэнні каалiцыi "За сумленныя, справядлiвыя выбары для лепшага жыцця", дзевяты затрыманы – кіроўца.
Па словах аднаго з затрыманых -- Уладзіміра Кацоры, мікрааўтобус быў спынены супрацоўнікамі Рэчыцкага ДАІ пад кіраўніцтвам маёра Ігара Лапаціна і капітана Васільчука на падставе таго, што транспартны сродак вельмі падобны на той, на якім 17 верасня было здзейснена ДТП, у якім пацярпела жанчына.
Быў таксама праведзены агляд мікрааўтобуса, у выніку якога высветлілася, што пад капотам таблічка прымацавана рознымі заклёпкамі.
На падставе гэтых двух названых прычын мікраааўтобус разам з пасажырамі быў дастаўлены ў Рэчыцкі райаддзел міліцыі. Кіроўца выкліканы для разбіральніцтва ў РУУС, пасажыры застаюцца чакаць яго і вынікаў разбіральніцтва ў мікраааўтобусе.
11.00. Па невядомых падставах у кіроўцы запатрабавалі зрабіць адбіткі пальцаў і зняцца на відэа. Дактыласкапічныя дадзеныя былі знойдзены ў базе міліцыі, а здымацца на відэа без удакладнення статуса кіроўца адмовіўся.
Супрацоўнікі ДАІ паведамілі затрыманым дэлегатам, што іх цікавіць толькі кіроўца, а самі яны могуць быць вольнымі.
11.50. Праваабаронца Леанід Судаленка паведаміў, што кіроўца адпушчаны. Супрацоўнікі ДАІ сказалі, што выклічуць яго асобна позвай, каб высветліць сітуацыю з біркай пад капотам.
Дэлегаты вырашылі праверыць, ці сапраўды яны могуць быць вольнымі, і адышлі ад аддзялення міліцыі. Іх не затрымлівалі. Пасля вызвалення кіроўцы ўсе накіраваліся ў Гомель, паколькі ехаць у Мінск на ўстаноўчы сход аказзалася ўжо позна і нямэтазгодна.
10.40. Старшыня АГП Анатоль Лябедзька паведаміў у сваім Фэйсбуку пра затрыманне двух дэлегатаў устаноўчай канферэнцыі з Барысава: Льва Марголіна і Лыско.
