Баранавічы: запланаваны пікет пад лозунгам “Дзеянні ўлады – пад грамадскі кантроль”
Рыгор Грык, грамадскі актывіст з Баранавіч
Грамадскі актывіст Рыгор Грык падаў у мясцовы гарвыканкам чарговую заяву на правядзенне пікету пад лозунгам “Дзеянні ўлады – пад грамадскі кантроль”.
– У Баранавічах чыноўнікі парушаюць дэкрэты, распараджэнні Прэзідэнта, законы, таму хачу выказаць пратэст супраць невыканання “слугамі народа” ці “народнымі абраннікамі” законаў і ўказаў Прэзідэнта, – паведаміў Рыгор Грык.
Пікет, у якім плануецца ўдзел 3-х чалавек, запланаваны ў старым парку культуры і адпачынку па вул.Камсамольская (пляцоўка з боку вул.Царука).
Да сваёй пісьмовай заявы ў гарвыканкам Рыгор Грык прыклаў асабістае абавязальніцтва заяўніка масавага мерапрыемства і копіі дамоў з ЖКГ, паліклінікай і міліцыяй.
У выпадку забароны пікету грамадскі актывіст просіць чыноўнікаў патлумачыць канкрэтную прычыну, па якой яму забаранілі масавае мерапрыемства ў дазволеным месцы.
Дарэчы, усе папярэднія заявы баранавіцкіх грамадскіх актывістаў на пікеты ў 2012-2013 гг. мясцовы гарвыканкам не задаволіў.
