Брэст: два пікеты ў Дзень правоў чалавека (фота)

Адзін пікет быў заяўлены старшынёю Брэсцкага абласнога прафсаюза радыёэлектроннай прамысловасці Зінаідай Міхнюк, другі – праваабаронцам Уладзімірам Вялічкіным. На пікеце, арганізаваным РЭП, выказваліся за абарону правоў працоўных, на другім -- патрабавалі свабоду палітвязням, трымаючы ў руках плакаты з іх партрэтамі і паштоўкі з выявай Алеся Бяляцкага за кратамі.

Пікет, арганізаваны ў падтрымку правоў працоўных, у якім удзельнічалі 22 чалавекі, не ахоўвалі міліцыянты, былі толькі заўважаны постаці ў цывільным. Праваабарончы пікет у падтрымку палітвязняў быў пад пільным прыглядам міліцыі ў асноўным у форме, колькасць якіх яўна перавышала колькасць пікетоўшчыкаў (якіх было 8). Па словах сябра партыі Справядлівы свет Людмілы Дзенісенка, яна прыйшла на пікет, каб людзі не забывалі, што ў краіне ёсць палітзняволеныя, якія павінны быць на свабодзе. Яе муж Аляксандр Дзенісенка салідарны з жонкай. Удзельнік пікету Яўген Бяласін выказаў меркаванне, што людзям патрэбна свабода.

Удзельнікі абодвух пікетаў былі незадаволены тым, што вымушаны выказваць сваё меркаванне практычна ў бязлюдных месцах.

Пікеты прайшлі мірна і без эксцэсаў.