Лукашэнка пагражае прадпрымальнікам, якія будуць удзельнічаць у забастоўках
Аляксандр Лукашэнка.
18 лютага на нарадзе, дзе прысутнічалі чыноўнікі і прадпрымальнікі, Лукашэнка заявіў апошнім: “Мяне не трэба пужаць. Калі хтосьці з вас пачне баставаць, я выдам такі ўказ, што вы ўжо не зможаце выйсці на працу не толькі на сваёй гандлёвай кропцы, але ні ў адным месцы краіны”.
Пытанні, якія абмяркоўваліся на сустрэчы, датычыліся зменаў у заканадаўстве для прадпрымальніцкай дзейнасці. Адно з самых балючых пытанняў для ІП – новыя правілы сертыфікацыі для вырабаў лёгкай прамысловасці – працэдура атрымання сертыфікатаў працяглая і затратная, на 80% атрымаць сертыфікаты наогул немагчыма. Некалькі разоў прадпрымальнікам удавалася адтэрмінаваць увядзенне новых правілаў у межах Мытнага саюза, але падобна, што з прыняццем новага ўказа сертыфікацыя стане абавязковай. Прадпрымальнікі звярнуліся з просьбай, каб для пачатку суправаджальныя дакументы ўводзіліся на адну-дзве групы тавараў, а пасля стварэння ўмоваў для таго, каб ІП маглі закупляць тавар з дакументамі, пераводзіць астатнія групы.
Сустаршыня «Рэспубліканскай канфедэрацыі прадпрымальніцтва» Віктар Маргелаў мяркуе, што многія індывідуальныя прадпрымальнікі негатыўна адрэагуюць на падпісанне ўказа «Аб некаторых пытаннях рэалізацыі тавараў індывідуальнымі прадпрымальнікамі і іншымі фізічнымі асобамі». Праект указа дапрацуюць на працягу месяца.
