Алесь Бяляцкі падзякваў салігорскім праваабаронцам за маральную падтрымку
Партрэт Алеся Бяляцкага ў выкананні Марыны Напрушкінай
Салігорскія праваабаронцы атрымалі ліст ад зняволенага беларускімі ўладамі кіраўніка Праваабарончага цэнтру “Вясна” Алеся Бяляцкага. Палітвязень дзякуе калегам са сталіцы шахцёраў за маральную падтрымку і не губляе пачуцця гумару нават у няволі.
- Жартуе, што “зэк сядзіць, а тэрмін ідзе”. Піша, што ў яго ўсё збольшага нармальна ды перадае ўсім сябрам прывітанне, - кажа пра атрыманую вестку ад Алеся Бяляцкага яго салігорскі паплечнік Леанід Мархотка.
Цытуе спадар Мархотка і не зусім вясёлыя, хутчэй літаратуразнаўча-філасоўскага характару развагі зняволенага праваабаронцы: “У свой час Максім Танк спаабаваў пілаваць краты вершамі. А Алесь Гарун чакаў, пакуль іх з’есць іржа. Анатоль Сыс вышываў сабе на сэрцы “залатыя краты”. Там, дзе беларусы - там і яны. Так што - усё нармальна...”
