Бабруйск: суд не дапамог актывісту свабоднага прафсаюза ўзнавіцца на працы

У бабруйскім судзе 13 чэрвеня разгледзелі справу сябра Свабоднага прафсаюза Беларускага, грузчыка складметала АМТС Віктара Осіпава, з якім 30 красавіка бягучага года кіраўніцтва завода ТДіА (трактарных дэталяў і агрэгатаў) не працягнула кантракт. Нягледзячы на хадатайніцтвы непасрэднага начальніка "свабодаўца" і яго калег, Віктар застаўся без працы.

Старшыня завадской пярвічкі СПБ Міхаіл Кавалькоў ад пачатку не верыў у станоўчае рашэнне суда: адміністрацыя завода падчас непрацягнення кантакта выканала ўсе неабходныя юрыдычныя нормы. Ён кажа, што звярнуцца ў суд ім давялося па маральных прычынах, каб яшчэ раз узняць праблему пазбаўлення працлўных месцаў рабочых па прафсаюзнай прыкмеце.

У мінулым годзе на заводзе ТДіА не працягнулі кантракт з трыма сябрамі СПБ - Дзмітрыем Курмазам, Дзмітрыем Сакалоўскім, Сяргеем Пічуговым. У бягучым годзе такім жа чынам страцілі працу Аляксандр Мікітка і Віктар Осіпаў.