Выдадзены паартыкульны каментар да Закона Рэспублікі Беларусі "Аб адвакатуры і адвакацкай дзейнасці"
16 ліпеня 2014 г. у г. Мінску адбылася прэзентацыя паартыкульнага каментара да Закона Рэспублікі Беларусі "Аб адвакатуры і адвакацкай дзейнасці". Каментар утрымлівае аналіз нормаў беларускага заканадаўства аб адвакатуры на прадмет іх адпаведнасці міжнародным стандартам.
Кніга выдадзенаявыдавецтвам "Беларускі Дом друку" і з'яўляецца вынікам працы калектыва юрыстаў некалькіх краін, якія валодаюць навуковай кампетэнцыяй і практычным вопытам у названай сферы. Разам з нацыянальнымі экспертамі ў працы аўтарскага калектыву прынялі ўдзел Дзмітрый Барценеў, адвакат, член Камісіі па метадычнай рабоце Адвакацкай Палаты Санкт-Пецярбурга, выкладчык Санкт-Пецярбургскага дзяржаўнага універсітэта, кандыдат юрыдычных навук (Расія); Аркадзь Бушчанка, адвакат, Выканаўчы дырэктар Украінскага Хельсінкскага саюза па правах чалавека (Украіна); Алена Сапожнікава, адвакат (Украіна); Мікалай Петшак (Mikołaj Pietrzak), адвакат, старшыня Камісіі Правоў Чалавека пры Вышэйшым Адвакацкім Савеце (Польшча); Марцін Джэрэмі Макбрайд (MCBrid Martin Jeremy), прафесар, дырэктар праграмы па праву і практыцы правоў чалавека ў універсітэце Бірмінгема (Вялікабрытанія).
Навуковым рэдактарам паартыкульнага каментара да Закона Рэспублікі Беларусі "Аб адвакатуры і адвакацкай дзейнасці" з'яўляецца Сяргей Галубок, кандыдат юрыдычных навук, адвакат адвакацкага бюро Санкт-Пецярбурга «Семяняка, Галубок і партнёры» (Расія).
Каментар закліканы садзейнічаць ўсведамленню і прасоўванню прынцыпу незалежнасці адвакатуры як інструмента, які забяспечвае права кожнага на атрыманне эфектыўнай юрыдычнай дапамогі. Адрасуецца адвакатам, работнікам дзяржаўных органаў, а таксама шырокаму колу грамадскасці.
Высновы і рэкамендацыі, уключаныя ў каментар, могуць служыць асновай для ўдасканалення беларускага заканадаўства аб адвакатуры.
У прэзентацыі Каментара прынялі ўдзел прадстаўнікі беларускай грамадзянскай супольнасці, журналісты і практыкуючыя юрысты.
L. ESHRA
