Журналістаў і актывіста БХД, затрыманых каля “Мацярыка”, адпусцілі праз тры гадзіны

У другой палове дня 3 верасня на пляцоўцы каля гандлёвага цэнтру «Мацярык» (раён метро “Каменная Горка”) супрацоўнікі міліцыі затрымалі двух актывістаў БХД, якія збіралі подпісы за адключэнне ў Беларусі расейскіх тэлеканалаў у сувязі з падзеямі ва Ўкраіне, а таксама журналістаў, што асвятлялі падзею. Сярод затрыманых – журналіст "Новага часу"-  Вячаслаў Пяшко.

Усіх даставілі ў Фрунзенскі РУУС Менска, дзе ва ўсіх затрыманых забралі тэлефоны. Як паведаміў ў facebook Дзяніс Садоўскі, на актывіста БХД  быў складзены пратакол апытання адносна ажыццяўлення збора подпісаў.

Амаль праз тры гадзіны пасля затрымання ўсіх вызвалілі з міліцэйскага пастарунку без складання пратаколаў аб адміністратыўным правапарушэнні.