Затрыманне Алены Дубаносавай следчы камітэт лічыць законным
Актывіст кампаніі “Гавары праўду” Леанід Дубаносаў з Мікашэвічаў атрымаў адказ на сваю скаргу аб затрыманні на вуліцы яго жонкі Алены і змяшчэнні яе на 3 сутак у следчы ізалятар. Старэйшы следчага следчага аддзялення Лунінецкага раённага следчага камітэта па Брэсцкай вобласці маёр Колчын паведаміў, што ў выніку праверкі крымінальная справа ў адносінах да супрацоўнікаў аддзела барацьбы з эканамічнымі злачынствамі Лунінецкага РАУС Уладзіміра Макейчыка і Аляксандра Ермаковіча, якія затрымлівалі Алену Дубаносаву, узбуджацца не будзе ў сувязі з адсутнасцю ў іх дзеяннях складу злачынства. Адначасова ў лісце паведамляецца, што і ў адносінах да Алены Дубаносавай таксама крымінальная справа не будзе заведзена “за адсутнасцю ў яе дзеяннях складу злачынства”.
Рашэнне адносна адмовы ва ўзбуджэнні крымінальнай справы на супрацоўнікаў міліцыі Леанід Дубаносаў збіраецца абскарджваць у вышэйстаячых арганізацыях.
