Алесь Бяляцкі: Пазіцыя Швецыі ў дачыненні да Беларусі застанецца нязменнай
Міністр замежных спраў Швецыі Марго Вальстрэм і старшыня ПЦ "Вясна" Алесь Бяляцкі.
Пад час працоўнага візіту ў Швецыю, старшыня Праваабарончага цэнтра “Вясна” і віцэ-прэзідэнт Міжнароднай федэрацыі за правы чалавека (FIDH) Алесь Бяляцкі 23 кастрычніка сустрэўся з міністрам замежных спраў Швецыі Маргот Вальстрэм. Мы звязаліся з праваабаронцам па тэлефоне, каб пачуць з першых вуснаў пра ягоныя ўражанні ад высокай сустрэчы:
“Сёння ў мяне адбылася сустрэча з міністрам замежных спраў Швецыі спадарыняй Маргот Вальстрэм. У прыязнай атмасферы я падзяліўся з ёй сваімі думкамі і назіраннямі пра ўнутраную грамадска-палітычную сітуацыю ў Беларусі. Пад час размовы таксама былі абмеркаваныя некаторыя аспекты, што датычацца беларуска-расейска-украінскіх адносінаў”.
Алесь Бяляцкі заклікаў урад Швецыі не мяняць сваю пазіцыю ў адносінах да беларускіх уладаў і па-ранейшаму патрабаваць вызвалення палітычных зняволеных, а таксама аказваць падтрымку грамадзянскай супольнасці Беларусі.
Маргот Вальстрэм шчыра цікавілася меркаваннямі праваабаронцы пра сённяшнюю сітуацыю ў Беларусі. На завяршэнне сустрэчы палітык падцвердзіла, што пазіцыя Швецыі ў дачыненні да Беларусі будзе нязменнай і прынцыповай.
