Алесь Бяляцкі стаў ганаровым грамадзянінам Сіракузы
Мэр Сіракузы Джанкарла Гароцца ўзнагароджвае Алеся Бяляцкага
26 лютага гарадскія ўлады Сіракузы (італьянскі рэгіён Сіцылія) прысвоілі беларускаму праваабаронцу Алесю Бяляцкаму ганаровае грамадзянства "горада міру і правоў чалавека".
Урачыстая цырымонія праходзіла ў зале імя Паала Барселіна з удзелам мэра горада Сіракуза Джанкарла Гароца, старшыні гарадскога савета Антоніа Сула, дэпутатаў гарадскога муніцыпалітэта, прадстаўнікоў розных няўрадавых арганізацый і актывістаў Групы 85 Amnesty International - Італія, якая была ініцыятарам ушанавання беларускага праваабаронцы.
Рашэнне аб прысваенні Алесю Бяляцкаму звання Ганаровага грамадзяніна Сіракузы, па прапанове гарадскога мэра, было аднагалосна прынята дэпутатамі ў выніку галасавання 11 лістапада 2014 года. Дэпутаты палічылі, што беларускі праваабаронца "ў поўнай меры ўпісваецца і адпавядае" культурным традыцыям горада Сіракуза, які быў абвешчаны "горадам міру і правоў чалавека".
Гэта падкрэсліваецца ў рашэнні дэпутатаў муніцыпалітэта, якое яны прынялі, “разгледзеўшы заяву кіраўніка горада аб прадастаўленні ганаровага грамадзянства Алесю Бяляцкаму, старшыні Праваабарончага цэнтра "Вясна", улічваючы, што ён быў неабгрунтавана арыштаваны і прыцягнуты да прымусовай працы, улічваючы, што ён быў прызнаны Amnesty International вязнем сумлення і з'яўляецца мужным абаронцам правоў чалавека і ў поўнай меры ўпісваецца і адпавядае культурным традыцыям нашага горада, што быў абвешчаны "горадам свету і правоў чалавека".
Кіраўнік "Вясны", распавёўшы пра становішча ў галіне правоў чалавека ў Беларусі, выказаў усім прысутным на цырымоніі падзяку за падтрымку дэмакратычнай супольнасці яго краіны. "Несумненна, прысваенне мне гэтага ганаровага звання скіравана таксама на ўмацаванне дэмакратычных традыцый і тэндэнцый у нашым грамадстве і супраць аўтарытарызму, які пануе на сённяшні дзень у Беларусі. Улады Сіракузы дэманструюць высокія стандарты ў дачыненні да правоў чалавека, якія стаяць вышэй стандартаў такіх еўрапейскіх краінаў, як сённяшняя Беларусь, дзе ёсць палітычныя зняволеныя, смяротнае пакаранне і ўлада кіруе шляхам застрашэння грамадства", - перадаў змест свайго выступу Алесь Бяляцкі.
Мір і правы чалавека патрабуюць пастаяннай увагі, і паколькі Еўропа з'яўляецца невялікім кантынентам, то сённяшнія падзеі ва ўсходняй яе частцы не далёкія ад Сіцыліі, таму неабыякавасць да таго, што адбываецца, з боку сіцылійскага грамадства вельмі важная, лічыць праваабаронца.
Алесь Бяляцкі наведаў Сіракузу ў рамках свайго візіту ў Італію, арганізаванага нацыянальным аддзяленнем праваабарончай арганізацыі Amnesty International, актывісты якога актыўна падтрымлівалі беларускага праваабаронцы ў час яго палітычна матываванага зняволення ў 2011-2014 гадах.
Нагадаем, што ў 2010 годзе муніцыпалітэт італьянскай Генуі прысвоіў кіраўніку ПЦ "Вясна" і віцэ-прэзідэнту FIDH званне ганаровага грамадзяніна горада, а падчас зняволення, у 2012-м, Алесь Бяляцкі быў удастоены ганаровага грамадзянства Парыжа.
