Справу Жанны Бразоўскай суд адправіў на дапрацоўку

10 лютага суддзя суда Кастрычніцкага раёна Аляксандр Сяргей вынес пастанову аб вяртанні справы спявачкі Жанны Бразоўскай (Знакавай) на дапрацоўку ў Кастрычніцкі РУУС.

Суддзя палічыў, што пратакол аб адміністрацыйным правапарушэнні па арт. 23.4 у адносінах да Жанны Бразоўскай і дадзеныя да яго матэрыялы справы не адпавядаюць форме і зместу патрабуемых Працэсуальна-выканаўчым кодэксам аб адміністрацыйных правапарушэннях, а менавіта ўказаныя ў пратаколе абставіны здзяйснення правапарушэння не адпавядаюць тым, што былі ўстаноўлены ў ходзе судовага разбіральніцтва.

“Указаныя супярэчанні пры апытанні асобаў і складанні пратакола высветлены не былі. Абставіны здзяйснення адміністрацыйнага правапарушэння выкладзены не поўна”, - адзначаецца ў пастанове.

Нагадаем, 15 снежня мінулага году Жанну Бразоўскую, вядомую пад псеўданімам Жанны Знакавай, спынілі на вуліцы незнаёмыя мужчыны ў цывільным, паказалі пасведчанні супрацоўнікаў міліцыі і папрасілі праехаць з імі. Калі Жанна адмовілася – яе з гвалтам і прымяненнем фізічнай сілы закінулі ў аўтамабіль без адпаведных апазнавальных знакаў, усяляк зневажаючы пры гэтым. Ёй стала блага.

Затым Бразоўскую даставілі ў Кастрычніцкі РУУС, дзе склалі адміністрацыйны пратакол па артыкуле 23.4 КаАП (Непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў). Санкцыя па гэтым артыкуле прадугледжвае штраф ад 2 да 50 базавых велічынь (ад 360 тысяч да 9 мільёнаў рублёў) або адміністрацыйны арышт. Усяго Жанна правяла ў пастарунку каля 7 гадзін. 

Неўзабаве Жанна накіравала звароты ў пракуратуру Кастрычніцкага раёна, раённы аддзел Следчага камітэта, ўпраўленне ўласнай бяспекі МУС і Адміністрацыю прэзідэнта. Яна прасіла аб адмене пратаколу, які лічыць незаконным, і скардзілася на дзеянні супрацоўнікаў РУУС, якія пераблыталі яе з іншым чалавекам, нібыта датычным да правапарушэння. Разгляд гэтай адміністратыўнай справы распачаўся 28 студзеня ў суддзе Кастрычніцкага раёна г. Мінска.