У першы дзень вясны - Нуль дыскрымінацыі!
1 сакавіка ў трэці раз ва ўсім свеце адзначаецца дзень «Нуль дыскрымінацыі». Па ініцыятыве ЮНЭЙДС гэты дзень закліканы нагадаць аб праве кожнага чалавека пражыць паўнавартаснае жыццё з годнасцю - незалежна ад таго, як ён выглядае і каго ён любіць.
У гэтым годзе арганізатары і актывісты кампаніі заклікаюць людзей шанаваць і прымаць культурную разнастайнасць, а таксама прызнаваць тыя здольнасці і веды, якімі валодае кожны з нас. ЮНЭЙДС лічыць, што падтрымка разнастайнасці ва ўсіх яе формах умацоўвае сацыяльнае адзінства і дае значныя перавагі для краін ва ўсім свеце.
"У дзень "Нуль дыскрымінацыі" мы павінны заявіць пра сябе і разам змагацца за права жыць, не падвяргаючыся стыгматызацыі і дыскрымінацыі", - сказаў Мішэль Сідзібе, выканаўчы дырэктар ЮНЭЙДС. - Падтрымліваючы разнастайнасць, мы можам змяніць будучыню".
Кожны можа выказаць сваю падтрымку кампаніі праз малюнкі, фатаграфіі, аўдыё і відэа, размясціўшы іх у сацыяльных сетках з хэштэгам #zerodiscrimination і падключыўшыся да «Нуль дыскрымінацыі» у Facebook, Twitter і Instagram.
На сайце арганізацыі можна знайсці паштоўкі, постэры і плакаты.
Даведка:
Аб'яднаная праграма Арганізацыі Аб'яднаных Нацый па ВІЧ / СНІДу (ЮНЭЙДС) узначальвае і натхняе свет для дасягнення адзінага бачання: нуль новых ВІЧ-інфекцый, нуль дыскрымінацыі і нуль смерцяў з прычыны СНІДу. ЮНЭЙДС аб'ядноўвае намаганні 11 устаноў ААН - УВКБ ААН, ЮНІСЕФ, ВПП, ПРААН, ЮНФПА, ЮНОДК, «ААН-жанчыны», МАП, ЮНЕСКА, СААЗ і Сусветны банк - і цесна супрацоўнічае з глабальнымі і нацыянальнымі партнёрамі для таго, каб пакласці канец эпідэміі СНІДу да 2030 года ў рамках Мэтаў ўстойлівага развіцця.
Сімвалам нулявой дыскрымінацыі з'яўляецца малюнак матылька, які шырока прызнаны як сімвал пераўтварэнняў.
