Няма рэгістрацыі - не будзе і сацыяльнай адаптацыі
Андрэй Князькоў, які атрымаў вытворчую траўму ў папраўчай калоніі, а зараз спрабуе дамагчыся выплат матэрыяльнай кампенсацыі, распавёў ПЦ "Вясна", як на справе адбываецца сацыяльная адаптацыя былых зняволеных.
Пасля вызвалення ў Андрэя Князькова не было месца для пражывання, таму зараз ён жыве ў доме начнога знаходжання для асоб без пэўнага месца жыхарства. Нядаўна ён змог атрымаць там часовую рэгістрацыю на год.
З-за траўмы галавы ў былога асуджанага 3 група інваліднасці, аднак пасля праходжання медыка-рэабілітацыйнай экспертнай камісіі (МРЭК) яму ўдалося зняць усе абмежаванні па працоўнай дзейнасці. Але знайсці працу апынулася не так проста.
“На МРЭК мне адмянілі ўсе абмежаванні. Спектр работ, дзе я магу быць задзейнічаны, досыць вялікі. Таксама мне было рэкамендавана прайсці праграму сацыяльнай адаптацыі праз тэрытарыяльны цэнтр занятасці. Я звярнуўся ў такі цэнтр, але так як я асоба без пэўнага месца жыхарства на мяне дадзеныя нарматывы чамусьці не распаўсюджваюцца, - распавядае Андрэй Князькоў. - Прыйшлося шукаць працу самому. Добра, што мне пасадзейнічалі ў таварыстве інвалідаў Партызанскага раёна - уладкавалі на сацыяльнае прадпрыемства падсобным рабочым на заробак у два мільёны. Мала, але хоць нешта”.
Зараз былы асуджаны плануе схадзіць на прыём да намесніка начальніка адміністрацыі Партызанскага раёна, які ў тым ліку займаецца пытаннямі адаптацыі былых асуджаных.
“Па законе любы асуджаны мае права на такую адаптацыю, калі ён у ёй мае патрэбу. Яму прадастаўляюцца працоўныя месцы і ўсё неабходнае. Адна з маіх мэтаў цяпер - атрымаць інтэрнат.
А то зараз у мяне атрымліваецца, як у казцы пра Бураціна: «Бяздомны, беспрацоўны, непісьменны, таму цябе пасадзяць у турму». А я не хачу больш у турму!”, - адзначае Андрэй Князькоў.
Таксама ён плануе дамагацца ўстанаўлення віны наймальніка - РУП «Папраўчая калонія №2 г. Бабруйска» - у няшчасным выпадку, які адбыўся з ім падчас знаходжання ў папраўчай калоніі.
На дадзены момант рашэнне суда аб выплаце матэрыяльнай кампенсацыі Андрэю Князькову за вытворчую траўму ў памеры 40 мільёнаў беларускіх рублёў прыпынена, справа запатрабавана ў пракуратуру, дзе яна будзе знаходзіцца, як мяркуецца, да канца красавіка.
“Адказчык ўжо апавясціў судовага выканаўцу, што будзе звяртацца ў суд за растэрміноўкай выплаты. Гэта значыць зноў будзе прызначацца пасяджэнне, але толькі пасля таго, як справа вернецца з пракуратуры. Думаю, што да канца года можа што-небудзь і змагу з кампенсацыі атрымаць.
Але ў адказчыка больш чым дастаткова варыянтаў, каб выкруціцца і нічога не выплачваць, таму яны ўсяляк спрабуюць абысці закон і пазбегнуць пакрыцця шкоды. Усё гэта можа цягнуцца да бясконцасці”, - кажа былы асуджаны.
Зараз Андрэй Князькоў пры падтрымцы ПЦ "Вясна" плануе звярнуцца ў Следчы камітэт з заявай аб правядзенні праверкі гэтым дзяржаўным органам, у надзеі, што СК зможа ўгледзець віну наймальніка ў парушэнні аховы працы зняволеных.
