Замест пікетаў – мыльныя бурбалкі
Віцебскія сябры аргкамітэту па стварэнні партыі БХД, якім мясцовыя ўлады не дазваляюць праводзіць пікеты па важных сацыялных праблемах, вымушаны шукаць новыя формы грамадскай актыўнасці.
18 красавіка ў Віцебску адбыўся перформанс “Бурбалкі беларускай стабільнасці”. Удзельнікі насамрэч пускалі мыльныя бурбалкі ў мікрараёне Білева. А на пытанні мінакоў, чаму раптам дарослыя людзі займаюцца такой дзіцячай забавай, адказвалі тое ж, што казалі б на забароненых пікетах.
“Усё, што абяцаюць улады наконт паляпшэння, умацавання дабрабыту свайго народу, якому яны служаць"верай і праўдай", - бурбалкі. Бурбалкі – гэта і не збудаваны паліклінічны комплекс у Білева, таксама ж – і школа, і дзіцячы садок, якіх дужа бракуе жыхарам новага мікрараёну. Бурбалка - гэта і абяцаная паліклініка ў раёне Поўдзень-7, бурбалка – новы корпус бальніцы ў Оршы, бурбалка – новая паліклініка ў Наваполацку - усё гэта бурбалкі. Бурбалкі – гэта няспраўджаныя абяцанні, вунь яны лятуць, празрыстыя, вясёлкавыя, радуюць вока. Імгненне - і яны зніклі, як ніколі не было”, - патлумачыа сэнс перформансу Таццяна Севярынец.
Праблема медычнага абслугоўвання – ці не самая важная для Беларусі, лічаць актывісты БХД. Але абмеркаваць гэтую праблему з землякамі не дазваляюць мясцовыя ўлады. Так, у Віцебску былі забаронены пікеты ў Першамайскім і Чыгуначным раёнах Віцебска, правядзенне якіх планавалася на 8 красавіка. А ў Оршы быў забаронены пікет супраць спынення будаўніцтва новага корпуса шпіталя імя Сямашкі, запланаваны на 6 красавіка.
У такой сітуацыі, калі немагчыма выйсці на масавую акцыю, не парушыўшы адміністрацыйнага заканадаўства, віцебскія актывісты шукаюць новых формаў працы да прыцягнення ўвагі насельніцтва. Прыкладам, з ліку прыхільнікаў ідэяў БХД стварыўся калектыў “Энтузіясты”, які “перапявае” вядомыя песні з новымі словамі “на патрэбу дня”, робіць відэакліпы да іх і выкладае ў інтэрнэт. Цяжкая сітуацыя з будаўніцтвам новых медыцынскіх аб’ектаў таксама знашла сваё адлюстраванне ў творчасці “Энтузіястаў”.
