Затрыманыя ў Лоеве гомельскія журналісты-фрылансеры падалі заявы ў Следчы камітэт
Шыльда Следчага камітэта РБ.
Журналісты-фрылансеры з Гомелю Кастусь Жукоўскі і Аляксей Атрошчанкаў, якія былі затрыманыя 21 чэрвеня ў Лоеве, падалі заявы ў Следчы камітэт. Журналісты патрабуюць прыцягнуць да адказнасці міліцыянтаў, якія затрымлівалі іх і збівалі. Таксама абодва журналіста здымаюць пабоі, каб прывесці доказы супрацьпраўных дзеянняў лоеўскіх міліцыянтаў.
Жукоўскі і Атрошчанкаў правялі ў пастарунку больш за пяць гадзін, дзе ім выкручвалі рукі, клалі на падлогу і ставілі ногі на галаву, надзявалі кайданкі, пагражалі расправай - сведчаць журналісты. Таксама падчас затрымання была пашкоджана камера. У выніку ніякіх пратаколаў у дачыненні гомельцаў не склалі і адпусцілі ўвечары дадому.
Нагадаем, журналісты здымалі сюжэт пра праблемы мясцовага заводу па вытворчасці цэглы, адкрытага з помпай у 2005 годзе з удзелам кіраўніка дзяржавы, а зараз церпячага складанае эканамічнае становішча, праз якое пакутуюць мясцовыя жыхары, якія тут працуюць. Падчас працы яны былі затрыманыя міліцыяй.
