Гомель: крышнаіта судзілі за рэлігійныя спевы на вуліцы

20 ліпеня жыхар пасёлку Перамога Гомельскага раёну Сяргей Бондараў атрымаў на рукі копію пастановы суда Гомельскага раёну аб тым, што ён прыцягнуты да адміністрацыйнай адказнасці па артыкуле 23.34 КаАП – несанкцыянаванае масавае мерапрыемства. Суд адбыўся 18 ліпеня. Згодна пастановы, Сяргей Бондараў 24 мая ў Пінску «удзельнічаў у вулічным шэсці і спяваў рэлігійныя песні, чым парушыў закон аб масавых мерапрыемствах». На паседжанні жыхар Гомельскага раёну тлумачыў, што належыць да «Таварыства свядомасці Крышны» і сапраўды быў у Пінску, дзе на вуліцах горада разам са знаёмымі ён спяваў і іграў на акардэоне рэлігійныя песні. «Па патрабаванню супрацоўнікаў міліцыі вулічнае шэсце не спыніў і працягнуў яго», - гаворыцца ў пастанове суду.

Сяргей Бондараў расказвае, што ніхто з міліцыянераў і не прасіў спыніць шэсце і не спяваць. «На вуліцы Леніна ў Пінску мы ішлі і спявалі, як гэта робяць людзі па ўсім свеце – Харэ Крышна. Да нас падышоў участковы і перапісаў нашыя дадзеныя. Гэта так амаль заўсёды робіцца. І мы пайшлі далей. І тут пад’ехалі два аўтамабілі, нас завезлі ў аддзел. Потым ужо па вяртанні ў Гомель да мяне прыйшоў міліцыянер і склаў пратакол, з якім я не згодны. На тых рабят, якія былі са мной, наколькі я ведаю, пратаколы не складалі», - адзначыў жыхар Гомелю.

Па яго словах, раней ён не чуў, каб крышнаітаў штрафавалі за песні на вуліцы. «Мы бываем у розных гарадах, і на нас людзі рэагуюць вельмі прыязна, людзям нашы спевы падабаюцца, ніхто не скардзіцца, і мы нікому не перашкаджаем. Неяк у Брэсце на рынку да нас таксама прычапілася міліцыя, хацелі нас забраць, але людзі актыўна заступіліся за нас, прасілі пакінуць нас у супакоі, і міліцыя адступіла. І ў Пінску таксама – мінакі пыталіся ў міліцыі: за што вы іх забіраеце? Што яны вам зрабілі? Мы і спяваем дзеля людзей – ім гэта падабаецца», - падкрэсліў Сяргей Бондараў. Гэта яго першае ў жыцці адміністрацыйнае правапарушэнне, хоць сам жыхар Гомельскага раёну не лічыць, што ён парушаў закон.

Ён мае намер абскардзіць дадзены штраф.