Актывіста Сяргея Пальчэўскага на працягу тыдня аштрафавалі двойчы
Актывіст Сяргей Пальчэўскі
Актывіста Сяргея Пальчэўскага на працягу тыдня аштрафавалі двойчы агулам на 80 базавых велічынь, што складае 1680 рублёў.
6 кастрычніка ў судзе Цэнтральнага раёна Мінску разглядалася справа аб удзеле Сяргея Пальчэўскага ў правядзенні несанкцыянаваных масавых мерапрыемстваў 23 і 24 верасня. Актывіста абвінавацілі ў тым, што ён, не маючы дазволу Мінгарвыканкаму, размясціў стэнд з выявай бел-чырвона-белага сцяга ў пераходзе ля станцыі метро “Кастрычніцкая” і збіраў подпісы з мэтай прызнанне гэтага сцяга гістарычнай каштоўнасцю. На аснове паказанняў сведкаў суддзя Валерый Есьман прызнаў Пальчэўскага вінаватым у парушэнні ч.3 арт. 23.34 Кодэксу аб адміністрацыйных правапарушэннях (удзел у правядзенні несанкціянаванага масавага мерапремства паўторна цягам аднаго году пасля накладання адміністрацыйнага спагнання за такое ж парушэнне) і пастанавіў пакараць Пальчэўскага штрафам у памеры 30 базавых велічынь (630 рублёў).
А праз пяць дзён, 11 кастрычніка, суд Маскоўскага раёну Мінска разглядаў справу актывіста аб ўдзеле 12 верасня ў мітынгу за сапраўдныя выбары на плошчы Незалежнасці. У выніку Сяргей Пальчэўскі быў аштрафаваны на яшчэ большую суму - на 50 базавых велічынь, што складае 1050 рублёў.
Што датычыцца збору подпісаў за наданне бел-чырвона-беламу сцягу статусу нацыянальнай каштоўнасці, то штраф Сяргея Пальчэўскага далёка не адзіны падчас правядзення гэтай акцыі. У інтэрвью “Радыё Рацыя” актывіст Зміцер Дашкевіч распавёў, што на тых, хто збірае подпісы, міліцыянты штодзень складаюць прыкладна па чатыры адміністрацыйныя пратаколы. А значыцца цягам месяца іх назбіралася ўжо больш за сотню.
