У Мінску адбылася прэзентацыя кнігі “Міхась Кукабака” Фота

9 снежня ў кнігарні “Логвінаў” падчас імпрэзы з нагоды Міжнароднага дня правоў чалавека адбылася прэзентацыя дакументальнай кнігі «Міхась Кукабака», прысвечанай самаму вядомаму беларускаму дысідэнту савецкіх часоў. Выданне, падрыхтаванае Праваабарончым цэнтрам “Вясна” і Цэнтрам даследванняў грамадзянскай супольнасці Беларусі, уяўляе сабой зборнік артыкулаў, інтэрв’ю і лістоў беларускага іншадумца.

У мерапрыемствеі ўдзельнічаў сам Міхась Кукабака, які ў пачатку снежня адзначыў сваё 80-годдзе. Прэзентавала кнігу старшыня Цэнтра даследванняў грамадзянскай супольнасці Беларусі Паліна Сцепаненка, якая распавяла пра гісторыю стварэння кнігі.

Старшыня Цэнтра даследванняў грамадзянскай супольнасці Беларусі Паліна Сцепаненка

"Ідэю кнігі падаў Алесь Бяляцкі ў 2012 годзе пад час свайго знаходжання ў бабруйскай турме. Я атрымала ліст, у якім Алесь прасіў з’ездзіць нас у Маскву і ўзяць у Міхася Кукабакі вялікае інтэрв’ю. З таго часу мы пачалі актыўна працаваць над кнігай.

Кніга складаецца з чатырох частак. Першая частка – гэта аўтабіяграфія, якую напісаў сам Міхась Кукабака. Другая – гэта тое інтэрв’ю, якое было ўзята ў яго ў 2013 годзе ў Маскве. Наступная частка кнігі ўключае тэксты пра правы чалавека, якія пісаў беларускі іншадумец яшчэ ў 70-е гады. Таксама ў гэтым годзе да нас далучылася даследчыца беларускай эміграцыі Наталля Гардзіенка, і пры яе дапамозе ў кнізе з’явіўся важны раздзел пра ролю беларускай эміграцыі ў праваабарончым руху ў 50-е гады", - адзначыла Паліна Сцепаненка.

Пад час прэзентацыі кнігі праваабаронца Алесь Бяляцкі адзначыў, тэксты Кукабакі з’яўляюцца класікай беларускай дысідэнцкай публіцыстыкі. На думку старшыні Праваабарончага цэнтру “Вясна”, у сённяшнія часы займацца праваабаронай надзвычай лёгка.

Старшыня Праваабарончага цэнтру "Вясна" Алесь Бяляцкі

“Нягледзячы на наш вялікі вопыт праваабарончай дзейнасці, тое, праз што прайшлі савецкія дысідэнты, здаецца нечым неверагодным. Міхась Кукабака з’яўляецца рэдкім прыкладам чалавека, які ў тыя складаныя часы ўзяўся за тэму правоў чалавека і не спыніў гэтую працу, калі знаходзіўся за кратамі. У сваёй дзейнасці ён заўсёды прытрымліваўся прынцыпу мірнага супраціву. Ён – жывая легенда беларускай праваабарончай дзейнасці”, - сказаў Алесь Бяляцкі.

Дарэчы, змаганне Міхася Кукабакі са спадчынай савецкага мінулага працягваецца і зараз. Пад час свайго выступу на прэзентацыі ён распавёў, што напрацягу 10 апошніх гадоў спрабуе дамагчыся доступу да архіву інстытуту імя Сербскага, дзе захоўваюцца дакументы па яго справах 70-ых гадоў. Хоць Кукабака поўнасцю рэабілітаваны, і тэрмін сакрэтнасці ягонай справы даўно скончыўся, ён да гэтага часу не можа атрымаць гэтыя дакументы.

Міхась Кукабака

Беларускія праваабаронцы выказалі спадзяванне, што супраца з Міхасём Кукабакам працягнецца пад час далейшых даследванняў беларускага дысідэнцкага руху.

Міхась Кукабака — ураджэнец Бабруйска, беларускі дысідэнт савецкіх часоў, які за свае перакананні, адстойванне правоў чалавека, свабоды слова і распаўсюд Усеагульнай дэкларацыі правоў чалавека амаль на 17 гадоў быў пазбаўлены волі. Жыве беларускі іншадумца ў Маскве.