Навагодняе затрыманне ў Мінску
Затрыманне маладафронтаўцаў у навагоднюю ноч у Мінску. Фота з форуму onliner.by
11 студзеня на onliner.by з’явіўся матэрыял і фота пра затрыманне двух юнакоў на праспекце Незалежнасці ў навагоднюю ноч, 31 снежня. Па каментар карэспандэнт інфармацыйнага парталу звярнуўся ў ГУУС Мінгарвыканкама. Там не адмаўляюць, што на фота трапіў момант затрымання.
- Па зразумелых меркаваннях мы не можам агучыць падрабязнасці: хто і з якой прычыны праводзіў затрыманне, - паведаміў афіцыйны прадстаўнік ГУУС Аляксандр Ластоўскі.
Па інфармацыі, якая стала вядомая праваабаронцам “Вясны”, затрыманыя – актывісты “Маладога фронта” Павел Пракаповіч і Арцём Леўчанка.
Пасля жорсткага затрымання ў 23-20, непасрэдна ў аўтамабілі таксі, які актывісты паспелі выклікаць, іх даставілі ў Першамайскі РАУС, дзе пратрымалі да 04.30, пакуль не атрымалі загаду, што святочныя “гулянія” скончыліся і іх можна адпускаць з пастарунка.
Тым не меней супрацоўнікі міліцыі склалі пратаколы адміністрацыйных правапарушэнняў па артыкулах 17.1 КаАП (дробнае хуліганства) і 23.4 КаАП (непадпарадкаванне законным патрабаванням службовай асобе).
Нагадаем, падставай для затрымання стаў намер актывістаў "Маладога фронту" сустрэць Новы год на Кастрычніцкай плошчы пад бел-чырвона-белымі сцягамі, пра што яны абвясцілі напярэдадні. Адзін з лідэраў арганізацыі Зміцер Дашкевіч быў затрыманы прыкладна ў 23.30 на скрыжаванні вуліц Чарнышэўскага і Якуба Коласа.
Павел Пракаповіч і Арцём Леўчанка збіраюцца абскардзіць сваё незаконнае, на іх думку, затрыманне.
