Затрыманай у Мінску бежанцы з Чачні на радзіме пагражае смерць
Луіза Дудуркаева. Фота з сацсетак
22-гадовую бежанку з Чачні Луізу Дудуркаеву затрымалі ў мінскім аэрапорце і выдалі сваякам. Пра гэта ПЦ "Вясна" паведамілі псіхолаг Валянціна Ліхашва з РІГ "Максімум" (Мурманск) і юрыст дзяўчыны, якія суправаджалі яе ў пераезде ў Нарвегію, дзе ёй далі прытулак.
3 верасня Луіза Дудуркаева разам з давераным юрыстам і псіхолагам вылецелі з Мурманска ў Маскву, каб затым праз Мінск вылецець у Осла. Аднак, у маскоўскім аэрапорце іх чакалі паліцэйскія, якія заявілі, што дзяўчына знаходзіцца ў федэральным вышуку як асоба, якая страціла роднасную сувязь. На гэтай падставе ў Луізы Дудуркаевой ўзялі тлумачэнні, пасля чаго яна была адпушчаная, бо не было падстаў для яе затрымання. Па прылёце ў Маскву, паліцыянты зноў запатрабавалі тлумачэнняў ад дзяўчыны, на што яна распавяла ўсё тое ж самае, што казала і раней. Разам з юрыстам яны папрасілі выдаліць яе з базы федэральнага вышуку, і потым вылецелі ў Мінск.
4 верасня, прыбыўшы ў мінскі аэрапорт Луіза Дудуркаева і яе суправаджаючыя прайшлі пашпартны і мытны кантроль, ім паставілі адпаведныя адзнакі ў праязныя дакументы, і яны накіраваліся ў залю для пасадкі на наступны рэйс. Аднак, праз некаторы час іх вярнулі на пункт кантролю. Дзяўчыну супрацоўнікі міліцыі Беларусі адвялі ў пакой для допыту, юрыста туды не дапусцілі, не гледзячы на тое, што ў яго ёсць натарыяльна завераная даверанасць прадстаўляць яе інтарэсы. Як пазней стала вядома, з Луізай Дудуркаевой на працягу гадзіны размаўляў супрацоўнік крымінальнага вышуку, які адмовіўся прадставіцца праваабаронцам, але паказаў ім дакумент, дзе значылася, што дзяўчына знаходзіцца ў вышуку ўжо як зніклая без вестак.
Пасля допыту Луіза выйшла да праваабаронцаў ўся ў слязах, побач з ёй быў яе біялагічны бацька. Падстаў для яе затрымання па-ранейшаму не было, аднак, каб юрыст мог і далей прадстаўляць яе інтарэсы, дзяўчына павінна была пацвердзіць свае намеры працягнуць сваю паездку ў прысутнасці супрацоўнікаў міліцыі. Аднак, дзяўчына са слязамі выціснула з сябе, што паедзе дадому.
Праваабаронцы лічаць, што супрацоўнікі паліцыі далі інфармацыю аб намерах дзяўчыны і яе месцазнаходжанні сваякам супраць яе волі, а ў Чачні існуе пагроза яе жыццю.
"Луіза знаходзіцца ў перадсуіцыдальным стане. Я лічу, што яна змяніла сваё рашэнне пад уздзеяннем пагроз яе бацькі, які знаходзіўся пры допыце. Пры гэтым яе прадстаўніка на допыт не пусцілі. Шанцы, што па вяртанні ў Чачню, яе заб'юць вельмі і вельмі вялікія. Я сур`ёзна баюся за яе жыццё і здароўе. А супрацоўнікі беларускай міліцыі ўвесь гэты час адкрыта надсмяхаліся над ёй і над намі", - распавяла псіхолаг дзяўчыны Валянціна Ліхашва.
Як стала вядома, 22-гадовая Луіза бегла з Чачні ў канцы чэрвеня. З'ехаць яе вымусілі пагрозы пасля публікацыі фота ў супольнасці «Карфаген». Дзяўчыне дапамаглі праваабаронцы і 31 жніўня яна атрымала дакументы бежанкі і шэнгенскую візу ад Каралеўства Нарвегія.
Закрытая група «Карфаген» налічвае больш за 53 тысяч удзельнікаў. Паводле інфармацыі тэлеканала «Дождж», у групе актывісты публікуюць фатаграфіі чачэнак, якія, на іх думку, вядуць сябе амаральна. Адміністратары групы заклікаюць сваякоў дзяўчат «разабрацца» з іх паводзінамі.
