Кент Харстэд заклікаў улады Беларусі актывізаваць намаганні па правядзенні выбарчых рэформаў
Кіраўнік працоўнай групы па Беларусі ПА АБСЕ Кент Харстэд на парламенцкіх выбарах 2016 года ў Беларусі
Як паведамляе БелаПАН, спецпрадстаўнік Парламенцкай асамблеі АБСЕ па Усходняй Еўропе Кент Харстэд шкадуе, што працэс рэфармавання выбарчага заканадаўства Беларусі не прасоўваецца наперад, і заклікае беларускія ўлады актывізаваць намаганні па правядзенні рэформаў. Пра гэта гаворыцца ў паведамленні прэс-службы ПА АБСЕ, распаўсюджаным па выніках трохдзённага візіту Харстэда ў Беларусь.
Візіт праходзіў 22—24 студзеня. Харстэд сустрэўся ў Мінску з Аляксандрам Лукашэнкам, старшынёй Палаты прадстаўнікоў Уладзімірам Андрэйчанкам, міністрам замежных спраў Уладзімірам Макеем, кіраўніком Цэнтрвыбаркама Лідзіяй Ярмошынай, прадстаўнікамі апазіцыі, грамадзянскай супольнасці і дыпламатычнага корпуса.
Спецпрадстаўнік ПА АБСЕ таксама наведаў Беларускую гандлёва-прамысловую палату, Парк высокіх тэхнолагі і Беларуска-кітайскі індустрыяльны парк "Вялікі камень".
"Сталіца Беларусі, Мінск, стала амаль сінонімам намаганняў па вырашэнні буйных міжнародных крызісаў, ці то крызіс ва Украіне альбо нагорна-карабахскі канфлікт. Улічваючы гэты міжнародны ўклад, я таксама заклікаю беларускія ўлады надаць прыярытэтную ўвагу дэмакратычным рэформам, якія забяспечаць поўны ўдзел усіх беларусаў у дзейнасці органаў улады", — цытуе прэс-служба Харстэда.
Кент Харстэд, які з'яўляўся спецыяльным каардынатарам місій кароткатэрміновых назіральнікаў на апошніх парламенцкіх і прэзідэнцкіх выбарах у Беларусі, выказаў шкадаванне з нагоды таго, што працэс рэформы выбарчага заканадаўства ў Беларусі не прасоўваецца наперад.
"Я расчараваны, што шмат чаго не зроблена для правядзення такой неабходнай выбарчай рэформы, і заклікаю актывізаваць намаганні для таго, каб выбары ў 2020 годзе праводзіліся ў адпаведнасці з новым і палепшаным заканадаўствам", — сказаў спецпрадстаўнік.
Ён заклікаў ЦВК актывізаваць намаганні па выкананні рэкамендацый, зробленых Бюро па дэмакратычных інстытутах і правах чалавека АБСЕ па выніках выбараў.
У інтэрв'ю Таццяне Каравянковай, апублікаваным у інтэрнэт-газеце Naviny.by, Кент Харстед паведаміў, што тэма невыканання Беларуссю рэкамендацый АБСЕ па паляпшэнні выбарчага заканадаўства стане часткай справаздачы па выніках яго візіту ў краіну. "Справаздача будзе адпраўлены ўсім 56 краінам-сябрам Парламенцкай асамблеі АБСЕ. І гэтая тэма будзе абмяркоўвацца, таму што моцна напружвае тое, што працэс па змене выбарчага заканадаўства, ініцыяваны самімі ўладамі, зараз затух. Для многіх гэта выглядае дрэнна і відавочна не служыць інтарэсам Беларусі".
Пры гэтым Харстэд адзначыў, што ў апошнія гады супрацоўніцтва Беларусі з АБСЕ прасоўвалася як у колькасных, так і ў якасных адносінах.
"Беларусь уносіць значны ўклад у намаганні па падтрыманні міру ў Еўропе і АБСЕ праз правядзенне розных міжнародных мерапрыемстваў, у тым ліку мінулагодняй парламенцкай сесіі АБСЕ (прайшла ў Мінску ў ліпені 2017 года. — БелаПАН.), — сказаў ён. — Як арганізацыя мы таксама хочам унесці свой уклад у развіццё Беларусі і падзяліцца нашым вопытам у сферах бяспекі, эканомікі, абароны навакольнага асяроддзя і правоў чалавека".
Харстэд таксама заклікаў беларускія ўлады працягнуць працу па пытанні адмены смяротнага пакарання.
