Ператрус у кватэры берасцейскага блогера
Сяргей Пятрухін у судзе. Фота: Уладзімір Вялічкін.
У Берасці ў блогера Сяргея Пятрухіна супрацоўнікі міліцыі канфіскавалі ўсю аргтэхніку: ноўтбук, планшэт і смартфон.
Як паведаміў БелаПАН праваабаронца Раман Кісляк, аргтэхніка была канфіскаваная 12 мая падчас агляду кватэры Пятрухіна.
Паводле звестак праваабаронцы, супрацоўнікі міліцыі праводзілі агляд у межах праверкі заявы пра тое, што Пятрухін распаўсюдзіў у інтэрнэце паклёпніцкія звесткі ў дачыненні да супрацоўнікаў міліцыі. Правядзенне агляду санкцыянаванае пракурорам Берасця.
У кватэру берасцейскага блогера Сяргея Пятрухіна прыйшлі сілавікі з ператрусам. За працэдурай вобшуку можна было назіраць у прамым эфіры на ягоным канале Youtube “Народны рэпарцёр”. Сяргей Пятрухін распавёў у некалькіх словах пра прычыны ператрусу:
– Прыязджайце да мяне, тут АМАП і весялуха. А прыйшлі яны да мяне з той нагоды, што два міліцыянты збілі чалавека і падалі на мяне, што я ўзвёў паклёп на іх.
Сяргей Пятрухін звязвае папярэднія судовыя пераследы, а таксама цяперашні ператрус са сваёй пазіцыяй датычна будаўніцтва акумулятарнага завода кампаніяй IPOWER пад Берасцем, а таксама антыкарупцыйнымі рэпартажамі, якія ён змяшчае на сваім канале.
