Фотавыстава па праблемах міграцыі "Што нас аб'ядноўвае?" у Брэсце
24 траўня ў 19:00 у галерэі КХ у Брэсце адкрыецца выстава “Што нас аб’ядноўвае?”, якая звяртаецца да тэмы міграцыі, талерантнасці і гуманістычных каштоўнасцяў.
У цэнтры праекту — пытанне бежанцаў з Чачні ў Брэсце — не новая для горада сітуацыя, якая тым не менш усё яшчэ застаецца актуальнай. Досвед судачынення з прадстаўнікамі іншай культуры для многіх гараджанаў з’яўляецца праблемным. У межах выставы гледачам будзе прапанавана паглядзець на мясцовую міграцыйную абстаноўку з пазіцыі недыскрымінацыі, паразважаць над роўнасцю ўсіх людзей, зірнуць на сябе і іншых з агульначалавечага ракурсу.
Прадстаўленыя на выставе працы вядомага беларускага фатографа Сяргея Лескеця апісваюць сучасную Беларусь па-за вялікімі гарадамі. Ягоныя фатаграфіі — гэта партрэты і сюжэтныя замалёўкі зробленыя ў вёсках і мястэчках. Гэта аднапавярховая Беларусь, сучасная і разам з тым вельмі традыцыйная, клапатліва задакументаваная з вялікай увагай да дэталяў. На выставе дэманструюцца працы з сэрыі «AGRO», а таксама выбраныя здымкі, зробленыя для медыя.
Аксана Юшко — фатографка з Расіі, прадставіць здымкі з калектыўнага праекта «Грозны: Дзевяць гарадоў», які налічвае мноства матэрыялаў, зробленых падчас розных паездак у Чачню цягам дзесяці апошніх гадоў. У цэнтры ўвагі побыт і традцыі чачэнскага народу, персанальныя гісторыі гэтых людзей. Аксана Юшко падкрэслівае не толькі характэрныя для мясцовай традыцыі асаблівасці, аднак і ўдала перадае тое наднацыянальнае вымярэнне, уласцівае ўсім людзям без выключэння.
Падчас адкрыцця адбудзецца сустрэча з аўтарамі і экскурсія.
Куратар – Аляксей Талстоў.
Выстава «Што нас аб’ядноўвае?» даступная з 25 траўня па 10 чэрвеня, з чацвера па нядзелю з 15.00 па 19.00.
Уваход на выставу вольны.
Адрас прасторы КХ: Брэст, вул. Халтурына, 2/1.
