У Гародні 3 ліпеня жорстка затрымалі двух актывістаў. Адзін з іх у шпіталі Дапоўнена
Гарадзенскія актывісты Мiкалай Салянiк i Аляксандар Лаўрэнцеў 3 ліпеня, у Дзень незалежнасці, планавалi правесці пiкет падчас урачыстасцяў у Гароднi. Iх заблакавала мiлiцыя ў доме. Аўтамабіль гаспадара падперлi машынай мiлiцыi i хлопцаў доўга чакалі каля пад’езда.
- Мiкалай Салянiк i Аляксандар Лаўрэнцеў
Салянік і Лаўрэнцеў у турэмных робах выйшлі на вуліцу. На іх тут жа накінуліся невядомыя ў цывільным, вельмі жорстка і брутальна скруцілі, кінулі ў бус і вывезлі ў невядомым накірунку.
Журналісту-фрылансеру Руслану Кулевічу, які фатаграфаваў затрыманне, нехта ў цывільным даў кулаком у твар.
Ніхто не прадстаўляўся і не паказваў дакументаў. У выніку іх даставілі ў РАУС Кастрычніцкага раёна, але ў хуткім часе, як паведаміў праваабаронца Віктар Сазонаў, хуткая дапамога ўвезла Мiкалая Салянiка ў шпіталь. Вядома, што ў актывіста хворае сэрца. Аляксандар Лаўрэнцеў правёў ноч у ІЧУ.
Па стане на ранак чацвёртага ліпеня Мікалай Салянік па-ранейшаму знаходзіцца ў шпіталі. Па інфармацыі ад праваабаронцаў, справы Саляніка і Лаўрэнцева павінны прывезці ў суд Кастрычніцкага раёна пасля 14.00.
